एमाले कोशीको सचेतकमा चौधरी

विराटनगर । नेकपा एमाले कोशी प्रदेश संसदीय दलको सचेतकमा प्रदेश सभा सदस्य ललिताकुमारी चौधरी मनोनित भएकी छन् ।

कोशी प्रदेशको मुख्यमन्त्रीसमेत रहेका एमाले संसदीय दलका नेता हिक्मतकुमार कार्कीले संसदीय दलको विधानको दफा १० बमोजिम चौधरीलाई सचेतकमा मनोनित गरेका हुन् ।

दलका नेताको निर्णय अनुसार सोमबार एमाले संसदीय दलका प्रमुख सचेतक रेवतिरमण भण्डारीले प्रदेश सांसद चौधरीलाई सचेतकमा नियुक्त भएको पत्र प्रदान गरेका छन् । पत्रमा भण्डारीले नै हस्ताक्षर समेत गरेका छन् ।

सचेतक रहेकी प्रदेश सांसद कमला दर्नाल प्रदेश सभाको निकै महत्वपूर्ण न्याय, प्रशासन तथा विधायन समितिको सभापतिमा निर्वाचित भएपछि रिक्त भएको सचेतकमा चौधरीलाई नियुक्त गरिएको हो ।

दलका नेता कार्कीको भदौ २९ गतेको निर्णय अनुसार उनी सचेतकमा नियुक्त भएकी हुन् । मोरङको ग्रामथान स्थायी बसोबास रहेकी चौधरी एमालेकी समानुपातिक सांसद हुन् ।