प्रहरीले निवेदन नलिएको गुनासो

विराटनगर । दुई जनाको आक्रमणबाट घाइते मोरङको धनपालथानका एक पीडितले ज्यान बाँचे पनि प्रहरीले जाहेरी लिन अस्वीकार गरेको बताएका छन् ।

मोरङ प्रहरीले उजुरी दर्ता गर्न नमानेको गुनासो गर्दै गम्भीर घाइते उनले प्रहरीले निवेदन दर्ता नगरी मिल्न दबाब दिएर हप्काएको दाबी गरेका छन् ।

धनपालथान–६ रामचोकका ४० वर्षीय जोगिकुमार महतोले बिहीबार विराटनगरमा पत्रकार सम्मेलन गरेर न्यायको पहिलो खुड्किलोमै दबाब पाएकाले पीडकबाट थप पीडा पाउने अवस्था रहेको बताए ।

सडक मजदुर महतो गत १७ गते विराटनगरबाट काम गरेर साथी लक्षु महतोसँगै घरतर्फ जाँदै गर्दा कटहरी–४ नयाँ बजारमा दुई जनाले आक्रमण गरेको बताउँछन् । 

राति ८ बजे नास्ता खाएर निस्किने क्रममा बिजय सोरेन नामका ब्यक्तिस“ग सामान्य भनाभन भएपछि आक्रमण हु“दा टाउको फुट्नुका साथै करङ भा“चिएको उनको भनाइ छ ।

सोरेनको समूहले आफूलाई टाउकोमा भारी चिजले प्रहारका साथै कुटपिटसमेत गरेको बताउँदै महतोले आफू लडेपछि स्थानीय र प्रहरीले उपचारका लागि लगेको बताए । उनको कोशी अस्पताल र नोबेलमा उपचार भएको थियो ।

घटनाको भोलिपल्ट उनकी श्रीमती रूकोदेवी जिल्ला प्रहरी मोरङमा उजुरी दिन जाँदा प्रहरीले दर्ता गर्न नमानेको र उल्टै आफूहरूलाई हप्कीदप्की गर्दै पीडकसँग मिल्न दबाब दिएको महतोले दाबी गरे । 

त्यसको भोलिपल्ट पनि प्रहरीले त्यसैगरी फर्काएकाले सञ्चार क्षेत्रलाई गुहारेको पीडितको भनाइ छ ।

मोरङका प्रहरी प्रवक्ता वेदप्रकाश जोशीले मापसे गर्ने क्रममा दुईपक्षबीच विवाद भएको बताउँदै घटनाकै दिन प्रहरीले एक जनालाई नियन्त्रणमा लिए पनि पीडित पक्ष समयमा उजुरी लिएर नआएकाले छाड्नु परेको बताए ।