विराटनगरमा म्याजिक भ्यानको मनपरी, अवैध असुलीमा ट्राफिक प्रहरी

विराटनगर । यातायातको तीब्र चाप बढिरहेको कोशी प्रदेशको राजधानी विराटनगरमा यात्रुबाहक म्याजिक भ्यानले ट्राफिक लाइटको अवज्ञा गर्दा सडक प्रयोगकर्ता मर्कामा पर्ने गरेका छन् ।

ट्राफिक लाइट भएका ठाउँमा देब्रे घुम्ने सवारी साधनलाई सिधा जानुपर्ने म्याजिक भ्यानले अवरोध गर्छन् । 

म्याजिक भ्यानको सिण्डिकेटले ट्राफिक प्रहरीलाई समेत रकम बुझाउने भएकाले सडकमा नियम उल्लङ्घन गर्दा पनि उनीहरू कारवाहीमा पर्दैनन् । 

म्याजिक भ्यान सञ्चालकको कम्पनीका प्रतिनिधिले विराटनगरको महेन्द्रचोक उत्तरमा रकम संकलन गरेर ट्राफिक प्रहरीलाई पनि बुझाउने गरेका छन् ।

सोमबार अपरान्ह ६ बजे को १ ज ३३८२ नम्बरको म्याजिकलाई समितिका युवाहरूले रोकेर रकम माग गरे । 

गाडीमा यात्री नभएकाले चालकले एक सय रूपैयाँ दिन अस्वीकार गरेपछि बीच सडकमै युवाहरूले म्याजिक भ्यान १० मिनेटसम्म रोके । त्यसबेला केहीबेर सवारी आवागमन समेत प्रभावित भयो । 

भ्यान चालकले मंगलबार दुबै दिनको रकम दिने सर्तमा गाडी अगाडि बढाए ।

विराटनगर महानगरपालिकाबाट बस टर्मिनलमा सवारीसाधन पार्किङको शुल्क लिने ठेक्का लिएको रूद्राक्ष बिल्डर्स प्रालिको रसिद ति युवाहरूले म्याजिक भ्यान चालकलाई दिने गरेका छन् । 

रसिदमा म्याजिक भ्यान पार्किङ शुल्क ५० र भ्याटसहित ५६ रूपैयाँ ५० पैसा उल्लेख छ । 

भ्यान सिण्डिकेटका प्रतिनिधिले ५० रूपैयाँ ठेकेदारलाई र बाँकी रकम ट्राफिक प्रहरी तथा आफ्ना लागि खर्च गर्ने गरेका छन् ।

मोरङ ट्राफिकले सवारी साधनबाट राजश्व बाहेकको रकम संकलन गर्न हवल्दार र सहायक हवल्दार गरी दुई जना जनशक्ति परिचालन गरेको स्रोतले बताएको छ । 

उनीहरूले नै म्याजिक भ्यानको सिण्डिकेटबाट रकम संकलन गर्छन् । 

रकम संकलनमा हिंड्दा दुई मध्ये एक सरकारी मोटरसाइकलमा र एक सीटी सफारीमा हिंड्छन् ।  

विराटनगरको मुनालपथस्थित जिल्ला ट्राफिक प्रहरी कार्यालय अगाडि  कोशी राजमार्गमा नियमित जा“च हुन्छ ।

ट्र«ाफिक नियम पालना नगर्नेले अनलाइन जरिवाना तिर्नुपर्ने हुन्छ । चालकले राजश्वमा जाने जरिवाना ट्राफिक कार्यालय अगाडिको खाजा पसलेमार्फत अनलाइन बुझाउँछन् । 

पसलेले त्यसबापत सेवा शुल्क लिन्छन् । राजश्वमा नजाने जरिवाना भनें खाजा पसलमा चालकले जम्मा गर्नुपर्ने नियम बनाइएको स्रोतको भनाइ छ । 

सो रकमको हिसाब रकम संकलनमा हिंड्ने ती दुई जना ट्र«ाफिक प्रहरीले लिने गरेका छन् ।

‘बिल कहिले दिन्छन्, कहिले दिंदैनन्, ट्राफिक प्रहरीलाई पनि दिनुपर्ने भनेर दादागिरी शैलीमा पैसा उठाउँछन्’ एक चालकले भने । 

आफूले दिएको रकम ट्राफिक प्रहरीलाई पनि जाने भएकाले म्याजिक चालकले रातो बत्ती बलेको बेला देब्रे मोडमा गाडी रोकेर हरियो बत्ती बलेपछि सिधा जाने गरेका छन् । 

रातो बत्ती बलेका बेला म्याजिक भ्यानका कारण देब्रे मोडिने अन्य सवारी साधन रोकिन बाध्य हुने गरेका छन् ।

ट्राफिक लाइट भएका चोकमा रहेका ट्राफिक प्रहरीले सिधा अगाडि जाने म्याजिक भ्यानले देब्रे मोडलाई गरेको अवरोधलाई बेवास्ता गर्नुृको कारण रकम भएको बताइएको छ । 

हरित विराटनगरको अभियान चलाउँदै आएका पारूल क्षेत्री ट्राफिक प्रहरी रकम उठाउनेमा मात्रै केन्द्रित भएकाले यात्री असुरक्षित हुने गरेको बताउँछन् । उनी आफै वृक्षरोपणमा हिंड्दा सिटी सफारी चलाउँछन् ।

‘ट्राफिक प्रहरीले कसुर निर्धारण आफैं गर्छ र कमिशनका लागि राजश्व संकलन गर्छ’ क्षेत्रीले भने– ‘विराटनगरको ट्राफिक ब्यवस्थापन अहिले अस्तब्यस्त अवस्थामा छ ।’ 

ट्राफिक लाइट भएको ठाउँबाट देबे्रतर्फ मोडिन जुनसुकै बेला खुल्ला हुने भएकाले रातो बत्तीले रोकेको बेला पनि चालकले सवारी साधनलाई सडकको देब्रे तर्फ मोड्न पाउँछन् । 

देब्रे लेनमा यात्रुबाहक म्याजिकले अवरोध गर्दा एम्बुलेन्ससम्म रोकिने अवस्था आउने गरेको छ । 

कञ्चनबारी, बरगाछी, भटी मोड, रोडशेष, जलजला चोक र तीनपैनी गरी छ वटै ट्राफिक लाइट भएको स्थानमा देब्रे लेनमा समस्या छ । 

‘ट्राफिकको सिटीले नै अवरोध खुल्छ तर, त्यसो गरिंदैन’ सडक प्रयोगकर्ताको गुनासो छ ।

मोरङ ट्राफिकका प्रमुख राजन लम्साल म्याजिक भ्यानको स्टेशन नै नभएकाले ब्यवस्थित गर्न नसकेको तर्क गर्छन् । 

ट्राफिक नियम सिक्दैछौं भन्ने चालकहरू पनि रहेको बताउने उनले सडक प्रयोगकर्तालाई नियम सिकाउन अझै समय लाग्ने बताए । 

उनका अनुसार गएको आर्थिक वर्षमा सवारी नियम उल्लङ्घन गर्ने ९ हजार ४ सय ४० साना सवारी साधन कारवाहीमा परेका छन् ।

प्रदेश ट्राफिक प्रहरी कार्यालय इटहरीका निमित्त प्रमुख तथा नायव उपरीक्षक सन्तोष श्रेष्ठ देब्रे लेन क्लियर राख्न मातहतका ट्राफिक प्रहरीलाई निर्देशन दिने गरिएको बताउँछन् । 

देब्रे लेनमा रोकिएका सवारी साधनलाई देब्रे तर्फनै घुमाएर बाटो खुल्ला गर्ने गरिएको उनले बताए । तर, हेपाहा चालक र ट्राफिक प्रहरीको कम जनशक्तिका कारण नियम पालनामा समस्या रहेको उनको भनाइ छ ।