झापा गोल्डकपको उपाधि उचालेको भोलीपल्टै चर्च ब्वाईजलाई झड्का

सुनसरी, २९ फागुन । झापा गोल्डकपको च्याम्पियन चर्च ब्वाइज युनाइटेड अन्तर्राष्ट्रिय आमन्त्रण बुढासुब्बा गोल्डकप फुटबल प्रतियोगिताको पहिलो चरणबाटै बाहिरिएको छ ।

धरान रंगशालामा मंगलबार सम्पन्न अन्तिम क्वाटरफाइनलमा चर्च ब्वाइज युनाइटेड झापाको काँकडभिट्टा फुटबल ट्रेनिङ सेन्टरसँग १–० गोल अन्तरले पराजित हुँदै क्वाटर फाइनलबाटै बाहिरिएको हो । चर्च ब्वाईजले सोमबारमात्रै झापा गोल्डकपको उपाधि उचालेको थियो ।

चर्च ब्वाइजलाई पराजित गर्न काँकडभिट्टाका आशिष चापागाइँले निर्णायक गोल गरे । अभिषेक गुरूङले उपलब्ध गराएको पासलाई सदुपयोग गर्दै उनले खेलको ४४ औं मिनेटमा गोल गरेका हुन् । झापा गोल्डकप फाइनल खेलेर धरान पुगेको चर्च ब्वाइजका खेलाडी २४ घण्टा नबित्दै अर्को खेल खेल्नुपर्दा निकै थकित देखिन्थ्ये । 

पहिलो हाफमा फितलो प्रदर्शन गरेको चर्च ब्वाइजले दोस्रो हाफमा आक्रामक खेल प्रस्तुत गरेपनि नतिजा उल्टाउन सकेन । झापा गोल्डकप च्याम्पियन बनाउन गोल गरेका राजेश परियार र बिदेशी खेलाडी अबियानी ओलावासेनले विपक्षीको पोष्टमा कुनै आक्रमण बुन्न सकेनन् । 

दोस्रो हाफमा चर्चले विपक्षी पोष्टमा दुईवटा माक्र आत्रण बुन्न सकेपनि गोल गर्न चुक्यो । ५४ औं मिनेटमा किपर बिट भइसकेको अवस्थामा राजेश परियारले गरेको हेड बललाई काँकडभिट्टाका देबन्द्र तामाङले जोगाए । इञ्जुरी समयमा चर्चका गोलकिपर अगाडि बढेर गरेको हेड बल फ्रेममा पर्न सकेन ।

पहिलो हाफमा रक्षात्मक खेलेर एक गोल गरेको गत वर्षको उपबिजेता टिम काकडभिटाले दोस्रो हाफमा पनि रक्षात्मक खेल खेल्दै नतिजा आफ्नो पक्षमा पारेको हो । 
मंगलबारको खेलको म्यान अफ द म्याच झापाका बिशाल घलान घोषित भए । उनले नगद १० हजार पाए ।

अब काँकडभिट्टा फुटबल ट्रेनिङ सेन्टरले दोस्रो सेमिफाइनल खेलमा न्यूरोड टिम एनआरटीसँग बिहीबार प्रतिष्पर्धा गर्नेछ । एनआरटी त्रिभुवन आर्मीलाई पराजित गर्दै सेमिफाइनल पुगिसकेको छ । 

त्यसअघि बुधबारको पहिलो सेमिफाइनलमा आयोजक धरान फुटबल क्लब र एन्फा मोरङबीच प्रतिष्पर्धा हुनेछ ।

आयोजकले पाहुना टोली युकेएफसी भारतलाई र मोरङले नेपाल पुलिस क्लबलाई पराजित गर्दै अन्तिम चारमा पुगेको हो ।

आगामी चैत ३ गतेसम्म सञ्चालन हुने प्रतियोगिताको विजेताले उपाधिसँगै १० लाख रूपैयाँ तथा उपविजेताले ५ लाख रूपैयाँ पुरस्कार प्राप्त गर्ने छन् ।