विश्व आदर्शलाई अन्तर कलेज क्रिकेटको उपाधि

सुनसरी । इटहरीमा सम्पन्न पहिलो अन्तर कलेज क्रिकेट प्रतियोगिताको उपाधि विश्व आदर्श कलेजले जितेको छ । इटहरी–९ स्थित जनता क्रिकेट पार्कमा बिहीबार सम्पन्न फाइनलमा नमूना कलेजलाई ११ रनले पराजित गर्दै विश्व आदर्शले उपाधि जितेको हो । 

पहिले ब्याटिङ गरेको विश्व आदर्शले निर्धारित २० ओभरको खेलमा ८ विकेट गुमाउँदै १ सय ४७ रन बनाएको थियो ।

जवाफमा १ सय ४८ रनको विजयी लक्ष्य पछ्याएको नमूना कलेजले निर्धारित ओभरमा ५ विकेट गुमाउँदै १ सय ३७ रन मात्र बनाउन सक्यो । प्रतियोगिताको सर्वोत्कृष्ट खेलाडी नमूनाका गौरव कटुवाल, विश्व आदर्शका भूपाल लुईंटेल उत्कृष्ट बलर, सुमन गहतराज उत्कृष्ट ब्यास्टमेन र रोशन शाह उदयीमान खेलाडी बने । 

विजेता तथा उपविजेता खेलाडीहरूलाई कोशी प्रदेश क्रिकेट संघका अध्यक्ष सर्वजीतराज पाण्डे, सदस्य शिव यादव, क्यान सुनसरी सचिव संजीव ढुंगाना, विश्व आदर्श कलेजका प्राचार्य गणेश दुलाललगायतले पुरस्कार वितरण गरे ।

इटहरी आदर्श जाइन्ट्सको आयोजनामा मंसिर २५ गतेदेखि भएको प्रतियोगितामा इटहरी क्षेत्रका ८ वटा कलेजको सहभागिता छ ।