राष्ट्रिय सभाको अध्यक्षमा नारायण दाहाल निर्वाचित

विराटनगर । राष्ट्रिय सभा अध्यक्षमा माओवादी केन्द्रका सांसद नारायण दाहाल निर्वाचित भएका छन् । मंगलबार अपरान्ह बसेको राष्ट्रिय सभाको बैठकले अध्यक्षमा दाहाललाई निर्वाचित गरेको हो । 

नेपाली कांग्रेसका उम्मेदवार रहेका सांसद युवराज शर्मालाई राष्ट्रिय सभाको अध्यक्षमा निर्वाचित गरियोस् भन्ने प्रस्ताव बहुमतले अस्वीकृत भएपछि दाहाललाई अध्यक्षमा निर्वाचित गरियोस् भन्ने प्रस्ताव पारित भएको हो । 

दाहाललाई राष्ट्रिय सभा अध्यक्ष पदमा निर्वाचित गरियोस् भन्ने प्रस्तावका पक्षमा ३९ मत परेको बैठकको सभाध्यक्ष उर्मिला अर्यालले घोषणा गरिन् । 

उनले दाहालको विपक्षमा १७ मत परेको जानकारी दिइन् । 

मंगलबार राष्ट्रिय सभा बैठकमा ५६ जना सांसद उपस्थित भएका थिए ।

अध्यक्षमा निर्वाचित दाहाललाई नेकपा माओवादी, नेकपा एमाले, नेकपा एकीकृत समाजवादी र जनता समाजवादीले समर्थन गरेका हुन् । 

कांग्रेसका शर्मालाई लोसपाले समर्थन गरेको थियो ।