बरगाछी–रानी सडकको सौन्दर्यीकरण गर्ने महानगरको तयारी, बुढाथोकीको संयोजकत्वमा समिति गठन

विराटनगर । विराटनगर महानगरपालिकाले बरगाछी–रानी छ लेन सडकको सौन्दर्यीकरण गर्ने भएको छ । महानगरको समन्वयमा विभिन्न बैंक तथा वित्तीय संस्था, विभिन्न व्यापारिक र सामाजिक संघसंस्थाको सहयोगमा छ लेन सडकका डिभाइडरमा फूल र विरुवा रोपेर सौन्दर्यीकरण  गर्न लागेको हो ।

त्यसका लागि महानगरले विराटनगर क्षेत्रभित्र रहेका विभिन्न बैंकका प्रदेश प्रमुख र प्रतिनिधिहरूसाग छलफल गरेको छ । मेयर नागेश कोइराला, उपमेयर शिल्पा निराला कार्की र प्रमुख प्रशासकीय अधिकृत राजेन्द्र पराजुलीको उपस्थितिमा भएको छलफलबाट बैंकर्स एसोसिएसनका अध्यक्ष सन्तोष बुढाथोकीको संयोजकत्वमा समितिसमेत बनाइएको छ ।

समितिमा ग्लोबल आईएमी बैंकका प्रदेश प्रमुख निश्चल अधिकारी, एनआईसी एशियाका प्रमुख हीराप्रसाद पौडेल, स्ट्यार्न्ड चार्टर बैंककी प्रदेश प्रमुख शर्मिला होमागाईं र कृषि विकास बैंकका प्रदेश प्रमुख रञ्जन खनाल सदस्य छन् । सामाजिक उत्तरदायित्व अन्तर्गत सबै बैंकहरू विराटनगरलाई सुन्दर र हराभरा बनाउन तयार भएका छन् ।

बरगाछीदेखि रानीसम्म ४६ वटा डिभाइडर छन् । ती सबै डिभाइडरमा एकै प्रकारका फूल र बिरुवा रोप्ने र त्यसको संरक्षण गर्ने गरी  माघ १५ गतेभित्र सौन्दर्यीकरणमा लाग्ने खर्च, दीर्घकालीन संरक्षणका लागि महानगरले गर्नुपर्ने कार्यलगायतका सुझावसहितको प्रतिवेदन तयार पार्नेछ ।

प्रतिवेदन तयार गर्नका लागि प्राविधिक सहयोग महानगरले उपलब्ध गराउनेछ । समितिले तयार पारेको प्रतिवेदनका आधारमा सौन्दर्यीकरणको काम अगाडि बढाइने महानगरको सरसफाई तथा वातावरण शाखाका प्रमुख पुनम दाहालले जानकारी दिए । महानगरले सौन्दर्यीकरणका लागि सहजीकरण गर्न शाखा प्रमुख दाहालसहित नगर प्रहरी प्रमुख राजन पौडेल र वातावरण शाखाकी इञ्जिनियर सुदीक्षा कार्कीलाई तोकेको छ ।

‘विराटनगर बनाउने दायित्व महानगरपालिकाको मात्रै नभएर यहााका सबै संघसंस्था र व्यक्तिहरूको पनि हो,’ मेयर कोइरालाले भने, ‘त्यसका लागि पहिलो चरणमा बैंकर्सहरूसित छलफल गरेका छौं । पहिलो चरणमा छ लेन सडक र त्यसपछि घिनाघाट–मिलनचोक सडक र महानगरका प्रमुख सडकहरूको क्रमशः सौन्दर्यीकरण  गर्ने योजना छ ।’

सबैको अपनत्व हुनेगरी महानगरले सौन्दर्यीकरण  अभियान सञ्चालन गर्न लागेको मेयर कोइरालाको भनाइ छ । रोपेको फूल र विरुवाको दीर्घकालीन संरक्षण गर्ने गरी महानगरले सौन्दर्यीकरण  गर्न लागेको उपमेयर शिल्पा निराला कार्कीले बताइन् । संरक्षणमा लाग्ने आर्थिक र जनशक्ति सबैको खाका तयार भइसकेपछि वृहत रुपमा सौन्दर्यीकरण  अभियान सुरु गरिने प्रमुख प्रशासकीय अधिकृत राजेन्द्र पराजुलीले बताए ।

भाटभटेनी विशालबजारले २ र पर्यटन व्यवसायी भविशकुमार श्रेष्ठबाट ३ वटा डिभाइडरको सौन्दर्यीकरण  गर्ने प्रतिबद्धता आइसकेको दाहालले जानकारी दिए ।

विराटनगरमा २० वटा वाणिज्य बैंकका प्रदेश र शाखा कार्यालयहरू सञ्चालनमा छन् । त्यसबाहेक वित्तीय संस्थाका केन्द्रीय र प्रदेश कार्यालयहरू पनि छन् । यसअघि नेपाल उद्योग परिसंघ कोशी प्रदेशले बरगाछी दक्षिणको एउटा डिभाइडरमा फूल र विरुवा रोपिसकेको छ ।