मोरङका नयाँ प्रजिअ एक सातादेखि भेटघाटमा व्यस्त

विराटनगर । मोरङका प्रमुख जिल्ला अधिकारी इन्द्रदेव यादव विराटनगरमा हाजिर भएको बुधबार एक साता पूरा भएको छ । 

पुस २४ मा हाजिर भएयता प्रजिअ  यादवले जिल्लाका राजनीतिक दलदेखि जनप्रतिनिधिसम्म, उद्योगीहरुदेखि गैरसरकारी संस्थाका प्रमुख र प्रतिनिधिसम्मलाई भेटेर अन्तरक्रिया गर्न भ्याइसकेका छन् । 

छलफल र अन्तरक्रियामा प्रजिअ यादव कति व्यस्त बनेका छन् भन्ने देखाउन बुधबार उनले गरेका छलफलले नै देखाउँछन् । 

बुधबार उनले मोरङ जिल्लाका सबै स्थानीय तहका प्रमुख–उपप्रमुख, अध्यक्ष र उपाध्यक्षसँग अन्तरक्रिया गरेर उनीहरुका कुरा सुनेका छन् । सो छलफलमा पालिकाका प्रमुख प्रशासकीय अधिकृतहरुको पनि उपस्थिति रहेको थियो ।

‘जिल्ला प्रशासनबाट भइरहेको सेवा प्रवाह, पालिकाहरुमा रहेको सुरक्षा अवस्था र चुनौतीबारे जानकारी लिने काम भएको छ’, बुधबारको बैठकबारे प्रशासन कार्यालय स्रोतले भन्यो ‘जनप्रतिनिधि र प्रमुख प्रशासकीय अधिकृतहरुसहितको बैठकमा तिनै विषयमा कुराकानी भएको छ ।’ 

बुधबार नै २७ औं भूकम्प सुरक्षा दिवसको अवसर पारेर यादवले जिल्लास्थित कार्यालयका प्रमुखसँग पनि अन्तरक्रिया गरेका छन् । 

जिल्ला प्रशासन स्रोतका अनुसार जिल्लामा हाजिर भएको पहिलो साता प्रजिअ यादवले भेटघाट र छलफलमा बिताएका छन् ।

यसअघि पुस २९ मा  उद्योग वाणिज्य संघ संगठनका प्रमुख र प्रतिनिधिहरुसँग भेटेर अन्तरक्रिया गरेका यादवले सोही दिन   आपूर्ति व्यवस्थापन र बजार अनुगमनसँग सम्बन्धित विषयका सरोकारवाला कार्यालयका प्रमुखहरुसँग छलफल गरेका थिए । 

पुस २८ मा गैरसरकारी संस्थाका प्रमुख र प्रतिनिधिहरुसँग भेटघाट गरेका उनले २८ गते दलका नेताहरुसँग भेटेर अन्तरक्रिया गरेका थिए । सोही दिन सञ्चारकर्मीसँग पनि उनले अन्तरक्रिया गरेका थिए । 

प्रमुख जिल्ला अधिकारी यादवले आफ्नो कार्यकालको कार्यसम्पादन मूल्यांकनको प्रतीक्षा गर्न भन्दै हरेक भेटघाटमा आत्मविश्वास प्रकट गर्दै आएका छन् । के उनले भने जस्तै यस्तो भेटघाट र अन्तरक्रियाले प्रशासनको कार्यक्षमता बढाउला ?

‘निश्चय नै बढाउँछ । किनभने प्रशासन प्रमुखले सबैभन्दा पहिला जिल्लाको समग्र वस्तुस्थिति बुझ्ने र सोही अनुसार योजना बनाउने गर्नु राम्रो हुन्छ’ प्रशासनका एक अधिकृतले भने ‘यसले राम्रै परिणाम दिने आशा गर्न सकिन्छ ।’ 

त्यसो त मोरङसहित कोशी प्रदेशका १४ वटै जिल्ला प्रशासन कार्यालयहरूको सेवा प्रवाह र कार्यक्षमताको स्तर मुलुकका अरू जिल्लाको भन्दा कमजोर रहेको नतिजा यसअघि नै सार्वजनिक भएको थियो । देशरभरीका ७७ जिल्लाहरूमध्ये यस्तो मूल्यांकन नतिजामा मोरङ ५० औं स्थानमा परेको थियो ।

जिल्ला प्रशासन कार्यालयहरू गृह मन्त्रालय मातहत चल्ने संघीय सरकारको एउटा मुख्य इकाई हुन् । उनीहरूको तालुकदार मन्त्रालयकै मूल्यांकनमा कोशीका सबैजसो जिल्ला अन्यत्रको दाँजोमा कमजोर देखिएका थिए । गृह मन्त्रालयले आर्थिक वर्ष २०८१–८२ को पहिलो त्रैमासिकको कार्य सम्पादन मूल्यांकन नतिजा सार्वजनिक गर्दा यस्तो देखिएको थियो । 

मन्त्रालयले निर्धारण गरेको ७७ जिल्लाको वरियतामा मोरङ ५० औं स्थानमा परेको हो । यसलाई सुधार्ने लक्ष्य लिएका यादवको असली परीक्षा सुरु भएको उनकै मातहतका कर्मचारीहरु बताउँछन् । 

सञ्चारकर्मीहरुसँगको भेटघाटमा उनले ‘म नराम्रो काम गर्ने सूचिमा चैं पर्दिन, कार्य सम्पादन हेर्नुहोला’ भनेका थिए । सो वचन अनुसार आफूलाई अब्बल देखाउन उनले प्रयास थालेका छन् ।