उद्योग संगठन मोरङको १४ सदस्यीय प्रतिनिधि मण्डल सिंगापुर प्रस्थान

विराटनगर । उद्योग संगठन मोरङका अध्यक्ष राकेश सुराना नेतृत्वको १४ सदस्यीय प्रतिनिधि मण्डल एशिया इकोनोमिक फोरममा भाग लिन शनिबार सिंगापुरतर्फ प्रस्थान गरेको छ । संगठनको ‘सिआईएम डेलिगेशन मिसन टु सिङ्गापुर’ नामक मिसनमा अध्यक्ष राकेश सुरानासहितको टोली सिंगापुर प्रस्थान गरेको जनाइएको छ ।

प्रतिनिधिमण्डलमा संगठनका निवर्तमान अध्यक्ष सुयश प्याकुरेल, वरिष्ठ उपाध्यक्ष नन्द किशोर राठी, उपाध्यक्षत्रय राजकुमार गोल्छा, भोलेश्वर दुलाल र बिपिन काबरा, कार्यसमिति सदस्य सुरेन्द्र गोल्छा, पारस लुनिया, जयन्द्र शर्मा, सिद्धार्थ काबरा, सिर्जन प्याकुरेल, बिरेन्द्र राठी, सन्तोष कुमार भगत र महानिर्देशक चुडामणि भट्टराई सहभागी छन् ।

एशिया प्रशान्त क्षेत्रका २७ भन्दा वढी देशका व्यापारिक समुदायहरू सहभागी हुने कन्फेडेरेशन अफ एशिया प्यासिफिक चेम्बर अफ कमर्स एण्ड ईण्डष्ट्रिज र सिंगापुर म्यानुफ्याक्चरिङ एशोसिएसनको संयुक्त आयोजनामा कार्तिक २६ र २७ मा हुन लागेको इकोनोमिक फोरम तथा ३८ औं क्यासी कन्फेरेन्समा सहभागी हुन टोली सिंगापुर उडेको हो ।

एशिया इकोनोमिक फोरममा सहभागिता जनाउँदै उत्कृष्ट चेम्बर अवार्ड ग्रहण गर्न टोली सिंगापुर उडेको जनाइएको छ ।

कोशी प्रदेश लगानी सम्मेलन २०८१ मा लगानीकर्ताहरूलाई आमन्त्रण गर्न र संगठनले आयोजना गर्ने विराट एक्स्पो २०२५ को प्रचार प्रसार तथा कोशी पर्यटन बर्ष २०८२ को प्रचार–प्रसार गर्ने गरी ४ वटा उद्देश्य लिएर टोली सिंगापुर प्रस्थान गरेको संगठनका अध्यक्ष राकेश सुरानाले बताए ।

दुई दिने चल्ने सम्मेलनमा विश्वव्यापी व्यापार, एआई प्रविधि र नवप्रवद्र्धन प्रभाव, दिगोपन, विश्वव्यापी रुपमा प्रभाव पार्ने महत्वपूर्ण विषयहरूमा विशेषज्ञहरूको नेतृत्वमा छलफल हुनेछ । त्यसैगरी व्यापार, आपूर्ति श्रृंखला र अन्य व्यापारिक विषयहरूका साथै एशिया प्रशान्त क्षेत्रका प्रमुख व्यापारिक साझेदारबीच विश्वव्यापी व्यापारको भविष्यका वारेमा अनुभवहरू साटासाट गर्ने कार्यक्रम रहेको छ ।

उक्त सम्मेलनको दोश्रो दिन अर्थात कार्तिक २७ गते १०औं क्यासी उत्कृष्ट लोकल चेम्बर अवार्ड बिग चेम्बर क्याटेगोरीको विजेताको रूपमा उद्योग संगठन मोरङ चयन हुन सफल भएको छ । सोही औपचारिक समारोहमा ट्रफी र युएस डलर २००० को नगद राशीको पुरस्कार प्रदान गरिने कार्यक्रम रहेको छ ।

एशिया प्रशान्त क्षेत्रका बिजनेश लिडर, लगानीकर्ताहरुहरुको बृहत सहभागिता रहने उक्त फोरमलाई अवसरका रुपमा प्रयोग गर्दै संगठनले कोशी प्रदेशका लगानीका सम्भावनाहरूबारे एशिया फोरमका सहभागीहरुलाई जानकारी गराउने जनाइएको छ ।

साथै अद्वितीय लगानीको सम्भावना रहेको कोशी प्रदेशमा लगानीका लागी कोशी प्रदेश सरकारका तर्फबाट आयोजना हुन लागेको कोशी प्रदेश लगानी सम्मेलन २०८१ सम्बन्धि औपचारिक आमन्त्रण गरिने संगठनका अध्यक्ष राकेश सुरानाले जानकारी दिए ।

आगामी माघ ११, १२ र १३ मा विराटनगरमा आयोजना हुने लगानी सम्मेलनमा अन्तर्राष्ट्रिय फोरममा प्रचार–प्रसार गर्न र आमन्त्रण गर्न प्रदेश सरकारले संगठनलाई अनुरोध गरेको अध्यक्ष सुरानाले जानकारी दिए ।

कोशी प्रदेश लगानी सम्मेलनलाई थप उपलब्धिमुलक बनाउन संगठनले गर्ने विराट एक्स्पोको ८ औं संस्करणको कार्यक्रम समेत उद्योग संगठनसँगको सह–आयोजनामा कोशी प्रदेश लगानी सम्मेलन गर्ने प्रदेश सरकारको निर्णय स्वागतयोग्य रहेको सूरानाले जानकारी दिए ।

कोशी प्रदेश सरकारले संगठनसँगको सह–संयोजनमा विराट एक्स्पोको आयोजना स्थलमा नै कोशी प्रदेश लगानी सम्मेलन २०८१ गर्ने औपचारिक पत्र पाएको जनाइएको छ । संगठनले विराट एक्स्पोको कार्यतालिका २०८१ माघ ११ देखि २० गतेसम्म डिग्री क्याम्पस विराटनगरमा गर्ने गरि कार्यतालिका परिमार्जन गरेको संगठनले जनाएको छ ।