रात्रीकालीन व्यवसाय व्यवस्थित र मर्यादित बनाउन छलफल

विराटनगर । विराटनगर महानगरपालिकाले विराटनगरमा सञ्चालित  गीत–गजल तथा दोहोरी–साँझलाई व्यवस्थित गर्न एउटा अनुगमन समिति गठन गरेको छ । 

दोहोरी–साँझ र गीत–गजल व्यवसायका कारण ध्वनि प्रदूषण र होहल्ला भएको भन्दै गुनासो आएपछि महानगरले व्यवसायीहरूलाई बोलाएर व्यवस्थित गर्न अनुगमन समिति बनाएको हो ।

महानगर प्रहरीका निरीक्षक राजन पौडेलको संयोजकत्वमा  गठित समितिमा होटल तथा पेयपदार्थ संघअन्तर्गतको रात्रीकालीन होटल व्यवसाय समन्वय समितिका अध्यक्ष सुरज श्रेष्ठ, महानगरको राजस्व महाशाखाका वासुदेव भण्डारी, नासाकु गीत–गजलकी सञ्चालिका वविता चौधरी र श्रीराम गीत–गजलका सञ्चालक नारायण तिम्सिना सदस्य छन् । 

समितिले ध्वनि प्रदूषण र पार्किङको अवस्था, राजस्व तिरे नतिरेको, सरसफाइ कार्ड बनाए नबनाएको लगायतका विषयमा अनगुमन गर्नेछ । 

बिहीबार भएको सरोकारवालाहरूसँगको छलफलमा महानगरका मेयर नागेश कोइरालाले तीन दिनभित्र ध्वनि प्रदूषण कम गर्न व्यवसायीहरूलाई निर्देशन दिएका छन् । विराटनगरमा सञ्चालित आधाभन्दा बढीले अझै पनि ध्वनि प्रदूषण कम गर्ने विधि नअपनाएको पाइएको छ । 

यसअघि मेयर कोइरालाकै पहलमा बसेको प्रमुख जिल्ला अधिकारी, मोरङका प्रहरी प्रमुख, राष्ट्रिय अनुसन्धानका प्रमुखलगायत सरोकारवालाको बैठकले राति १२ बजेसम्म होटल व्यवसाय सञ्चालन गर्न दिने निर्णय गरेको थियो । सोही निर्णयपछि राति ९ बजेसम्म सञ्चालन हुँदै आएका होटल व्यवसाय, गीत–गजल रेष्टुरेन्ट, दोहोरी–साँझ हाल १२ बजेसम्म सञ्चालन हुँदै आएका छन् । 

रात्रीकालीन व्यवसाय सञ्चालन गर्दा ध्वनि प्रदूषण, होहल्ला र अमर्यादित गतिविधि हुन नदिनेलगायतमा व्यवसायीहरूले नै सहमति जनाएका थिए ।

व्यवसायीकै आग्रहअनुसार रात्रीकालीन व्यवसाय सञ्चालन गर्न दिने निर्णय भए पनि व्यवसायीहरूले निर्णय कार्यान्वयन नगरेको मेयर कोइरालाको भनाइ थियो ।