संरचना नबन्दा वीरेन्द्र सभागृहमै प्रदेश सभा बैठकको तयारी

विराटनगर । कटहरीस्थित प्रदेश सभा सचिवालय परिसरमा सभा भवन नबन्दा विराटनगर महानगरपालिकाकै वीरेन्द्र सभागृहमा प्रदेश सभाको बैठक बस्ने तयारी अघि बढेको छ । 

प्रदेश सभाको बैठक बस्ने सभा कक्ष निर्माणको काम अघि नबढ्दा आगामी हिउँदे अधिवेशन वीरेन्द्र सभागृहमै गर्ने तयारी अघि बढेको हो ।

सभा हलको निर्माणका लागि कटहरीस्थित फलफूल तथा तरकारी थोक बजार केन्द्रको एउटा भवन प्रयोगमा ल्याउने तयारी भए पनि त्यसलाई सभाहलको ढाँचामा निर्माण गर्ने काम सुरु हुन सकेको छैन ।

जेनजी आन्दोलनका क्रममा देवकोटा चोकमा रहेको कोशी प्रदेश सभाको सचिवालय र सभाहल आगजनीबाट पूर्णरुपमा जलेपछि कटहरीमा सारिएको छ । 

तरकारी थोक बजारको कार्यालय भवनमा सचिवालय संचालनमा ल्याइए पनि सभा हल भने बन्न सकेको छैन ।

सभा हलकै अभाव देखाएर प्रदेश सरकारले अहिलेसम्म हिउँदे अधिवेशन बोलाएको छैन । 

वीरेन्द्र सभागृहको सभाहलमा प्रदेश सभाको बैठक बस्ने भएपछि प्रदेश सरकारले एक सातापछि बैठक बोलाउने तयारी अघि बढाएको जनाइएको छ ।

प्रदेश सभाको बैठक बस्ने सभा हल निर्माणका लागि ठेक्का लगाउने प्रक्रिया नटुंगिदा कटहरीमा हल निर्माण हुन नसकेको प्रदेश सभा सचिवालय स्रोतले जनाएको छ ।