मोरङ व्यापार संघ एक्स्पोमा शुक्रबार दुई करोडको कारोबार

विराटनगर । मोरङ व्यापार संघ एक्स्पो २०२३ मा शुक्रबार एकैदिन करीव दुई करोड रुपैयाँ बराबरको कारोबार भएको जनाइएको छ ।

स्वदेशी कृषि तथा औधोगिक उत्पादनसहित बंगलादेश र पाकिस्तान लगायतका अन्तर्राष्ट्रिय स्टलहरुमा समेत अवलोकनकर्ताहरुको आकर्षण बढेको छ ।

एक्स्पोका सबै स्टलहरुबाट प्राप्त कारोबारका आधारमा करीव २ करोड रुपैयाँको कारोबार भइसकेको एक्स्पोका मोरङ व्यापार संघका अध्यक्ष नविन रिजालले बताए ।

एक्स्पोमा दैनिक चर्चित कलाकारहरुले प्रस्तुति दिंदै आएका छन् । एक्स्पोमा विद्यालयहरुबाट विद्यार्थीहरुको उपस्थिति समेत उल्लेख्य रहेको जनाइएको छ ।

शुक्रबार मात्रै करीव आठ सय विद्यार्थीहरुले एक्स्पो अवलोकन गरेका छन् । उनीहरुले निशुल्क एक्स्पो अवलोकन गरेका हुन् । त्यसैगरी वृद्धवृद्धाहरुलाई समेत निःशुल्क अवलोकनको व्यवस्था गरिएको जनाइएको छ ।

नेपाली कलाकृतिमा आधारित प्रवेशद्वार र फ्रान्सको ‘आईफिल टावर’ को ५५ फिट अग्लो नमूना निर्माण भई त्यसमा जडित लाइट सिस्टमका कारण एक्स्पोमा जाने अवलोकनकर्ताहरुका सेल्फी जोन बनेको छ ।

पुस ६ गतेदेखि सुरु भएको एक्सो सोमबार औपचारिक रुपमा समापन हुँदैछ । 

शनिबार गायिका अस्मिता अधिकारी, राजन सिवाकोटी र कुटुम्भ ब्याण्डको प्रस्तुति रहेको जनाइएको छ ।