गाँजा बोकेर बोर्डर कट्न लागेको कार बरामद, तीनजना तस्कर पक्राउ

विराटनगर । मोरङ प्रहरीले विराटनगर महानगरपालिका–१८ राजा विराट चोकबाट गए राती ठुलो परिमाणमा गाँजासहित एउटा भारतीय नम्बरको कार बरामद गरेको छ । 

इलाका प्रहरी कार्यालय रानीको टोलीले भारतीय सीमा क्षेत्र नजिकैको आईसीपी सडक खण्डबाट डब्ल्यु बी १६ यु १०७१ नम्बरको कारबाट ७२ किलो गाँजा नियन्त्रणमा लिएको हो । 

कारभित्र लुकाएर बोर्डर कटाउन लागेको गाँजासहित प्रहरीले कारमा रहेका गाँजा तस्करीमा संलग्न तीन जनालाई समेत पक्राउ गरेको छ ।

गए राती करिव साढे २ बजे गस्तीमा खटिएको प्रहरी टोलीले कारमा लुकाइएको गाँजासहित उनीहरूलाई पक्राउ गरेको हो । 

पक्राउ पर्नेमा भारतको जोगबनीका ४० वर्षीय बैजनाथ रजक, पप्पु रजक र आलोक कुमार रजकलाई रहेको प्रहरीले जनाएको छ ।

रानीबाट भेडयारीतर्फ जाँदै गरेको कारलाई प्रहरीले रोकेर चेकजाँच गर्ने क्रममा कारभित्र लुकाइएको ७२ किलो लागूऔषध गाँजासहित कार र गाँजा लिनका लागि आएका तीन जना भारतीय नागरिकलाई नियन्त्रणमा लिएर अनुसन्धान अघि बढाइएको जनाइएको छ । प्रहरीलाई देखेपछि कारका चालक भने कार लक गरेर फरार भएको प्रहरीले जनाएको छ ।