धनकुटाको फेदीमा मारुती भ्यान र मोटरसाइकल ठोक्किंदा एकको मृत्यु, दुई गम्भीर

धनकुटा, २९ फागुन । धनकुटाको साँगुरीगढी गाउँपालिका–७ स्थित फेदीमा मंगलबार साँझ मारुती भ्यान र मोटरसाइकल ठोक्किंदा एक जनाको मृत्यु भएको छ । दुई जना गम्भीर घाइते छन् ।

धरानबाट धनकुटातर्फ गइरहेको गरेको को १ च ३२८० नम्बरको भ्यान र विपरित दिशाबाट जाँदै गरेको को ३३ प ८३५७ नम्बरको मोटरसाइकल साँझ करिब ६ बजेतिर फेदीमा ठोक्किएका हुन् ।

दुर्घटनामा मोटरसाइकलको पछाडि सवार साँगुरीगढी–६ का २५ बर्षीय विवश तामाङको मृत्यु भएको भेडेटार प्रहरी चौकीका इन्चार्ज जीवनकुमार कार्कीले बताए । 

दुर्घटनामा तामाङसहित मोटरसाइकल चालक साँगुरीगढी–६ का २२ बर्षीय अभिषेक राई र सोही स्थानका भेन चालक २८ बर्षीय तुलबहादुर राई गम्भीर घाइते भएको जनाइएको छ । 

दुर्घटनामा घाइते भएका तिनै जनालाई घटनास्थलमा उद्दार गरेर उपचारका लागि धरानस्थित वीपी कोइराला स्वास्थ्य विज्ञान प्रतिष्ठान पठाइएको भएपनि तामाङको भने उपचारकै क्रममा मृत्यु भएको हो ।

घाइते दुई जनाको प्रतिष्ठानमै उपचार भइरहेको जनाइएको छ ।