राहत शिक्षकको महाधिवेशनबाट मल्ल र धामी एकैपटक बने अध्यक्ष

काठमाडौं । नेपाल राहत शिक्षक केन्द्रीय समितिको छैटौं महाधिवेशनबाट अध्यक्षद्वयमा नवीनसिंह धामी र वीरेन्द्रकुमार मल्ल सर्वसम्मत चयन भएका छन् । काठमाडौंमा आइतबार सम्पन्न छैटौं महाधिवेशनबबाट वरिष्ठ सहअध्यक्षमा कृष्णराज बिष्ट, विनोद पासवान र भीमबहादुर सिंह सर्वसम्मत चयन भएका हुन् । सहअध्यक्षमा शारदा तिम्सिना र विष्णु खत्री चयन भएका छन् । 

त्यसैगरी उपाध्यक्षमा बुद्धिसिंह बिष्ट, टीकादेवी सापकोटा पोखरेल, हरेराम यादव, शिवशंकर कामती, शिवकुमार यादव र शारदा रायमाझी चयन भएका छन् । 

महासचिवमा डम्बर राई चयन भएका छन् । उपमहासचिवमा मोहन भण्डारी र सचिवमा कृष्ण दाहाल र विपिन आचार्य चयन भएका छन् । 

यस्तै सहसचिवमा मेनुका गौतम र शान्ति केसी चयन भए । त्यसैगरी सदस्यहरुमा रिता सापकोटा, वीरसिंह बुढा, लक्ष्मी खड्का, इन्द्रदेव यादवलगायत छन् ।

महाधिवेशनको उद्घाटन गर्दै शिक्षा विज्ञान तथा प्रविधि मन्त्री विद्या भट्टराईले राहत शिक्षकका समस्याहरु संघीय शिक्षा ऐनमा समेट्ने आश्वासन दिइन् । 

नेपाल शिक्षक महासंघका केन्द्रीय अध्यक्ष लक्ष्मीकिशोर सुवेदीलगायत शिक्षकका पेशागत घटक संघसंस्थाका प्रमुखहरूले शुभकामना दिंदै नेपाल सरकारलाई संघीय शिक्षा ऐनमार्फत ४० हजार राहत शिक्षकको समस्या हल गर्नका लागि सुझाव दिएका थिए । 

५९ वर्ष नौ महिनाका राहत शिक्षक हरि गुरागाईँले उद्घाटन गरेको छैटौं महाधिवेशनमा ७७ जिल्लाबाट ८५० जना प्रतिनिधिहरु सहभागी भएको निवर्तमान सचिव डीपी ढुंगेलले जानकारी दिए ।