सुनसरीको बर्जुमा भीषण आगलागी, २७ घर जले

विराटनगर । सुनसरीको बर्जू गाउँपालिका–४ स्थित जयनगर मुस्लिम टोलमा आइतबार दिउँसो भीषण आगलागी हुँदा २७ घर जलेका छन् । दिउँसो ३ बजेर १५ मिनेटतिर स्थानीय बिसुनदेव पौदारको घरबाट सुरु भएको आगो बस्तीमा फैलिएको हो ।

आगलागीबाट सबै घर पूर्ण रुपमा जलेको वडाध्यक्ष विनोद बहादुर गुरुङले जानकारी दिए । विराटनगरसहित विभिन्न पालिकाबाट पुगेका ६ वटा दमकलले आगलागी नियन्त्रणमा लिएको उनले बताए ।

एकै ठाउँमा घरहरू टाँसिएका कारण आगो फैलिएको थियो । अधिकांश घरको बेरा बाँसको टाटी र फुसको छानो भएका कारण बस्ती नै आगलागी भएको उनले बताए ।

आगलागीबाट मानवीय क्षति नभएपनि पशुचौपाया भने मरेको जनाइएको छ । कसैले पनि घरबाट सरसामान निकाल्न नपाएको वडाध्यक्ष गुरुङले बताए । केही मानिसहरू आगो निभाउने क्रममा घाइते समेत भएका थिए ।

आगलागी पीडितहरूलाई अहिले टेन्टको व्यवस्थापन गर्नका लागि पहल भइरहेको जनाइएको छ । उनीहरूलाई तत्कालका लागि ड्राइ फुडको व्यवस्थापन गर्ने तयारी भइरहेको वडाध्यक्ष गुरुङले बताए ।