कोशी ब्यारेजबाट हलुका सवारी साधन संचालनमा

विराटनगर । शनिबार अपरान्ह ४ बजेबाट आवागमन बन्द गरिएको कोशी ब्यारेज केहीबेर अघिबाट खुलेको छ । अहिले साइकल, मोटरसाइकल लगायतका हलुका सवारी साधन तथा अत्यावश्यक सेवाका साधनहरु संचालनमा आएका हुन् ।

सप्तकोशीमा पानीको बहावले उच्च खतराको सबै सङ्केत पार गरेका कारण यातायातका साधन संचालनमा रोक लगाइएको थियो । 

आइतबार बिहानसम्म साढे ६ लाख ६१ हजार ५ क्युसेक बहाव मापन भएको थियो । तर अपरान्हसम्म बहाव करीव आधा घटेका कारण ब्यारेजको पुलबाट सवारी आवागमन पूर्ण रुपमा संचालन गर्ने तयारी भइरहेको जनाइएको छ ।

पानी आधा नै घटेपछि सुनसरी प्रशासनले अहिले केहीबेरमै कोशी ब्यारेजको पुलबाट आवतजावत खोल्ने तयारी अघि बढाएको सुनसरीका प्रमुख जिल्ला अधिकारी रामचन्द्र तिवारीले जानकारी दिए ।

‘अबको आधा एक घन्टापछि कोशी पुलबाट आवतजावत खुला हुनेछ’ उनले भने ।