अभिषेक गिरीको विराटनगरदेखि काठमाडौंसम्मै फैलिएको ठगी र अपराध सञ्जाल

विराटनगर । जिल्ला अदालत मोरङबाट हाजिरी जमानीमा छुट्ने आदेश पाएका ‘गुण्डानाइके’ अभिषेक गिरीको एउटा भिडियो अहिले भाइरल छ । उनलाई प्रहरीले झ्याइँकुटी पारेर विराटनगर विमानस्थलमा भित्र्याउँदै थियो । उनी भने आफूलाई प्रहरीले मार्न लागेको बताउँदै ‘मानव अधिकार हनन भएको’ भन्दै कराइरहेका देखिन्छन् । 

यो सोमबार साँझको दृश्य हो । अदालतले थुनाबाहिरै राखेर अनुसन्धान गर्न आदेश दिएको केही समयमै उनलाई नेपाल प्रहरीको केन्द्रीय अनुसन्धान ब्यूरो (सीआईबी) ले नियन्त्रणमा लिएको थियो ।

सोमबार राति नै सीआईबीको टोलीले काठमाडौं लैजाने क्रममा गिरीलाई विमानस्थलमा प्रवेश गर्नुअघि प्रहरीको गाडीबाट ओलिएको थियो । प्रहरीका अनुसार उनी ओर्लिएर हिंड्न मानेनन् । हिंड्न नमानेपछि प्रहरीले झ्याँईकुटी पार्दै उनलाई विमानस्थलभित्र लगिएको थियो । 

मोरङ प्रहरीको अनुसन्धान नसकिदै काठमाडौं जिल्ला अदालतबाट पक्राउ अनुमति लिएर बसेको सीआईबीले गिरीलाई अदालत परिसरबाटै नियन्त्रणमा लिएपछि धेरैको चासो बढेको छ । 
अदालतबाट छुट्ने बित्तिकै गिरीलाई सीआईबीले किन समात्यो भन्ने जिज्ञासा धेरैको छ ।

यसबारे विज्ञप्ति निकालेर सीआईबीले जानकारी दिएको छ । सीआईबीका अनुसार गिरीलाई यसपटक कारागारभित्रको असुली मुद्दामा नभई काठमाडौंमा दर्ता भएको ठगी र आपराधिक विश्वासघात सम्बन्धी छुट्टै मुद्दामा पक्राउ गरिएको हो । 

श्रेष्ठ कन्सट्रसन नै अभिषेकको कब्जा

मोरङ जिल्ला अदालतले थुनामुक्त गरी बाहिरै राखेर अनुसन्धान गर्न प्रहरीलाई आदेश दिए लगत्तै पक्राउ परेका गिरीलाई नेपाल प्रहरीको केन्द्रीय अनुसन्धान व्यूरो (सीआईबी) ले ठगी तथा आपराधिक विश्वासघात कसुरमा काठमाडौं पु¥याएर अनुसन्धान अघि बढाएको छ ।

हिलो र धुलोको केन्द्र बनेको हुलाकी सडकको कटहरी खण्ड निर्माणको ठेक्का पाएका हेटौंडाको श्रेष्ठ कन्ट्रक्सन नै कब्जामा लिएर ठुलो आर्थिक हानी नोक्सानी पुर्याएको र चलअचल सम्पति समेत कब्जामा राखेको भन्दै ठेकेदार शुभाष श्रेष्ठले सिआईबी गुहारेपछि गिरी पक्राउ परेका हुन् ।

गिरीले विभिन्न व्यक्तिसँग आफ्नो पहुँच र चिनजान रहेको भन्दै विभिन्न आयोजनाको ठेक्का दिलाइदिने विश्वास दिलाएका आफ्नो कम्पनी आरसी सप्लायर्स एण्ड कन्स्ट्रक्सन प्रालिमार्फत हुलाकी सडक बनाउने गरी निर्माण व्यवसायी श्रेष्ठसँग सम्झौता गरेको पाइएको छ । तर उनले सडक निर्माण नै नगरी अलपत्र छाड्दा अहिलेसम्म यो सडक खण्ड गिरीले श्रेष्ठ कन्सट्रक्सनका मेसिन उपकरण नै कवाडीमा बिक्री गरिदिएको, घरजग्गा बलपूर्वक आफ्नो नाममा पारेको सिआईबीले जनाएको छ ।

निर्माण व्यवसायी श्रेष्ठको जाहेरीका आधारमा गिरीविरुद्ध काठमाडौं जिल्ला अदालतबाट पक्राउ पूर्जी जारी गरिएको थियो । 

गिरीले आफ्नो पुरानो आपराधिक प्रभाव र पहुँचको धाक देखाउँदै श्रेष्ठलाई आयोजनाहरूको ठेक्का पारिदिने विश्वास दिलाएका थिए । त्यसपछि उक्त ठेक्काको काम आफ्नो कम्पनी आरसी सप्लायर्स एण्ड कन्स्ट्रक्सन प्रालिमार्फत नियमानुसार सम्पन्न गरिदिने आश्वासन दिएर ठूलो रकम उठाएका थिए । 

तर, गिरीले आश्वासन बमोजिम काम नगरेपछि सम्झौता रद्द भई जाहेरवाला श्रेष्ठलाई ठूलो आर्थिक क्षति पुग्न गएको सीआईबीको प्रारम्भिक अनुसन्धानले देखाएको छ ।

सीआईबीले जारी गरेको विज्ञप्ति अनुसार गिरीको बदमासी यतिमा मात्र सीमित थिएन । 

उनले जाहेरवाला श्रेष्ठको निर्माण कार्यमा प्रयोग हुने सवारी साधनहरू अवैध रूपमा आफ्नो कब्जामा लिएका थिए । 

कब्जामा लिएका मध्ये केही सवारी साधनहरू त सवारी धनी श्रेष्ठलाई पत्तै नदिई कवाडीमा समेत बिक्री गरेर रकम हिनामिना गरेको पाइएको छ । 

यति मात्र नभएर गिरीले आफ्नो पुराना आपराधिक छविको त्रास देखाउँदै र डर–धम्कीको आडमा श्रेष्ठलाई काठमाडौंमा रहेको घरजग्गासमेत राजीनामा पास गर्न बाध्य पारेका थिए । 

जाहेरवाला श्रेष्ठले अन्य व्यक्तिहरूबाट प्राप्त गर्नुपर्ने रकमसमेत दबाब दिएर गिरीकै नाममा चेक काट्न लगाई अवैध आर्थिक लाभ लिएको सीआईबीको विज्ञप्तिमा उल्लेख छ ।

सीआईबीले जारी गरेको आधिकारिक वक्तव्यमा प्रतिवादी गिरीले आफ्नो विभिन्न व्यक्तिहरूसँगको चिनजान र पहुँचको दुरुपयोग गरी निर्माण व्यवसायीलाई ठगी गरेको, सवारी साधन कब्जा गरी कवाडीमा बेचेको र डरत्रास देखाई काठमाडौको घरजग्गासमेत आफ्नो नाममा गराइ आर्थिक लाभ लिएको र जाहेरवालालाई हानी पु¥याएको कसूरमा थप अनुसन्धान जारी रहेको प्रष्ट पारेको छ ।

कैदीबन्दीको भक्ता अवैध असुली

केही दिनअघि मात्रै उनलाई मोरङ कारागारमा असुली धन्दा चलाएको अभियोगमा प्रहरीले पक्राउ गरेको थियो । विराटनगर–८ मधुमारा घर भएका ४८ वर्षीय अभिषेक गिरी अपराध जगतमा कहलिएको नाम हो । 

विगत तीन दशकदेखि उनको नाम हत्या, अपहरण, फिरौती, ठेक्कापट्टा र गैरकानुनी असुलीसँग जोडिदै आएको छ । 

काठमाडौं उपत्यका खानेपानी लिमिटेडका लेखापाल अच्युतप्रसाद रेग्मीको अपहरण तथा शरीर बन्धक मुद्दामा १० वर्ष जेल सजाय काटेर उनी २०७९ चैत ५ गते मात्रै कारागारमुक्त भएका थिए । 

जेलबाट छुटेपछि गिरीले राजनीतिक संरक्षणको आड लिदै अभिषेक गिरी फाउन्डेसनमार्फत विद्यालयमा पोसाक तथा राहत बाँड्ने जस्ता सामाजिक काम गरेको नाटक गरेर आफ्नो छवि सुधार्ने र अवैध धनलाई वैध बनाउने प्रयास गरेको प्रहरीको भनाइ छ । 

बाहिर समाजसेवा र राजनीतिक शक्तिको आवरण बनाए पनि उनको भित्री अपराध सञ्जाल उत्तिकै सक्रिय रहेको प्रहरीको दाबी छ । 

गत असार १३ गते मोरङ प्रहरीले गिरीलाई विराटनगर–८ मधुमारास्थित उनकै घरबाट पक्राउ गर्दा बैंकहरूमा प्रयोग हुने पैसा गन्ने मेसिन फेला परेको थियो ।  

मोरङ कारागारका ५०० भन्दा बढी कैदीबन्दीले दिनभर पसिना बगाएर बुन्ने मुढा र गलैंचाको व्यापारको लाखौं रुपैयाँ आम्दानी सिधै गिरीको व्यक्तिगत बैंक खातामा जाने गरेको भेटिएको प्रहरीले बताउँदै आएको छ । 

त्यस्तै सरकारले कैदीबन्दीका लागि पठाउने दैनिक सिदा र लुगा भत्तासमेत गिरीको गिरोहले जबर्जस्ती असुल गर्ने गरेको उजुरी प्रहरीमा परेको छ ।