विनोद ढकाललाई पुनः शक्तिमा फर्काएको एमाले मोरङ अधिवेशन

विराटनगर । नेकपा एमाले मोरङको १० औं अधिवेशन यसपटक दुई वटा कारणले बढी चर्चामा रह्यो । पहिलो, यतिबेला एमाले अधिवेशन मोरङमा मात्रै भएको थियो । त्यसैले आम एमालेजनको ध्यान स्वाभाविक रुपमा मोरङ केन्द्रित थियो । 

मोरङ अधिवेशनले यो भन्दा पनि बढी चर्चा पाउने दोस्रो कारण चाहिँ सबैभन्दा मुख्य थियो ।  मोरङ एमालेमा यसपटक पार्टी  अध्यक्षसमेत रहेका प्रधानमन्त्री केपी शर्मा ओलीसहित उनी पक्षका सबै नेता एकातिर र पछिल्लो समय ओली समुहबाट टाढिएका मोरङकै नेता विनोद ढकाल अर्कातिर थिए ।  बुधबार भएको चुनावमा कोशीबाट केन्द्रमा प्रतिनिधित्व गर्ने नगन्य बाहेकका सबै नेता राजकुमार ओझाको पक्षमा उभिएका थिए । 

यसअघि प्रदेश अध्यक्षमा पराजित ढकालले भने अजम्बर राई नेतृत्वमा अलग्गै प्यानल बनाएका थिए । शुक्रबार साँझ पदाधिकारी हरुको मत गणना सकिएर अन्तिम परिणाम आउँदा अध्यक्ष, उपाध्यक्ष, सचिव र दुई उपसचिव पदमा ढकाल पक्षका उम्मेदवारहरु विजयी बनेका छन् । 

जस अनुसार संस्थापन पक्षका उम्मेदवारहरुलाई पराजित गर्दै ढकाल पक्षका उम्मेदवारहरु निर्वाचित  बनेका हुन् । 

शुक्रवार साँझ सकिएको पदाधिकारी तर्फको मत गणनाको अन्तिम परिणाम अनुसार ढकाल पक्षका अध्यक्षका उम्मेदवार  राईले ४४६ मत प्राप्त गर्दै जित हासिल गरेका हुन् । उनले संस्थापन पक्षका राजकुमार ओझालाई पराजित गरेका हुन् । ओझाले ४०७ मत प्राप्त गरेका छन् । 

उपाध्यक्षमा ढकाल पक्षका सागर थापा निर्वाचित भएका छन् । सागरले  ४२२  मत पाउँदा संस्थापनकी  शान्ती लिम्बुले  ३९१  मत पाएकी थिइन् । 

गएको जेठमा सागर थापालाई पार्टीको साधारण सदस्यसमेत नरहने गरि कार्वाही गर्ने कमिटीमा लिम्बू संयोजक थिइन् । कार्यकर्ताले भने कार्वाहीको निर्णयका लागि सिफारिस गर्ने लिम्बुलाई पराजित गर्दै सागरलाई पुरस्कृत गरेका छन् । 

सचिवमा ढकाल पक्षका  सोमराज थापा विजयी बन्दा उनले ४६२  मत पाएका छन् । संस्थापनका 

रबिन थापाले ३६८ मत पाएका छन् । 

उपसचिवमा सन्तोस वान्तावा ४९०  मत पाएर बिजयी भएका छन् । संस्थापनका इर्जालाल राजवंशीले ३११ मत पाएका छन् । 

उपसचिवमा उषा झा विजयी भएकी छन् । उनले ४१८ र संस्थापनकी शिल्पा कार्कीले ४०५ मत पाएकी छन् ।  उपसचिवमा पराजित कार्की विराटनगरकी उपमेयर हुन् ।  चुनावको अघिल्लो दिन मात्रै ढकाल प्यानल छाडेर संस्थापन समुहमा गएकी कार्कीलाई जिसस मोरङकी उपप्रमुख झाले संघर्षपूर्ण मतान्तरका वावजुद पनि पराजित गरेकी हुन् ।

अध्यक्ष केपी शर्मा ओली र उनको समूहका सबैजसो नेता र विनोद ढकाल समूहबीचको प्रतिस्पर्धामा परिणत भएको निर्वाचनले मोरङ एमालेमा ढकाललाई शक्तिमा फर्काएको छ । ऋषिकेश पोखरेल अध्यक्ष हुँदा ढकाल किनारामा परेका थिए । 

कुनैबेला ओलीका विश्वासपात्र मानिने विनोद ढकाल पूर्वको पार्टी संगठनमा माधव नेपालको जगजगी हुँदा ओली पक्षका एक मात्रै स्तम्भ मानिन्थे । 

समयक्रममा उनै ढकाल यतिबेला ओली र उनको टिमका नेताहरूसँग एक्लै भिड्ने विन्दुमा आइपुगे । अन्ततः ढकाल पक्षले चाहे जस्तै नतिजा मोरङमा आएको छ । 

यसको सुरूआत २०८० असोजमा भएको प्रदेश अधिवेशनबाट भएको थियो । त्यसबेला ढकाल केन्द्रीय सदस्य थिए । तर उनले प्रदेश अध्यक्षका दाबी गरे । ओली टिममा रहेका कोशीका नेताहरू गुरू बरालदेखि शेरधन राई, भानुभक्त ढकाल, हिक्मत कार्की लगायतले घनश्याम खतिवडालाई अघि सारेका थिए । 

२०७४ मा शेरधन राई मुख्यमन्त्री बनेपछि एकै टिममा भएर पनि ढकालको राई र कार्कीहरूसँग सम्बन्ध चिसिएको थियो । सोही कारण नेताहरूले कुनै बेला माधव नेपाल निकट रहेका खतिवडालाई च्यापे । आफ्नो टिमका नेताहरूले साथ दिएका खतिवडालाई अध्यक्ष ओलीले पनि समर्थन गरे । 

प्रदेशमा ढकाल हारे, खतिवडा जिते । त्यहीबेलादेखि ओली र उनको टिमसँग एक्लै भिडिरहेका ढकाल जिल्ला अधिवेशनमा आइपुग्दा पनि भिड्ने योजनासहित टिम लिएर मैदानमा थिए । 

एमाले नेताहरु गुरु बराल, शेरधन राई, भानुभक्त ढकाल, हिक्मत कार्की लगायतका नेताहरु ओलीले राजकुमार ओझालाई अध्यक्ष बनाउन भन्नुभएको छ भन्दै कार्यकर्ता फकाइरहेका थिए । 

उद्घाटन कार्यक्रममा पार्टी अध्यक्ष ओलीको सन्देश भन्दै उपाध्यक्ष रामबहादुर थापा बादलले उद्घाटन सत्रमा आएर ‘गुटबन्दी सह्य नहुने’ भन्दै सहमतिमा नेतृत्व चयन गर्न निर्देशन दिएका थिए । नेताहरुलाई उनले पनि ओझालाई अध्यक्ष बनाउन भनेका थिए । 

उपाध्यक्ष गुरू बराल, उपमहासचिव प्रदीप ज्ञवाली, प्रदेश इन्चार्ज शेरधन राई, कोशीका मुख्यमन्त्री हिक्मत कार्की, प्रदेश अध्यक्ष घनश्याम खतिवडा, स्थायी कमिटी सदस्य भानुभक्त ढकाल, सांसद ऋषिकेश पोखरेल लगायत धेरैले सहमतिमा नेतृत्व छान्नुपर्ने भन्दै भित्रभित्रै ओझाकै नाम अघि सारेका थिए । 

जितपछि ढकाल पक्षका विजेता उम्मेदवारले नेताहरुले गरेको अन्याय कार्यकर्ताले उल्टाएको बताएका छन् ।

"हामीलाई नेताहरुले अन्याय गरेका थिए, कार्यकर्ताले न्याय गरे" उपाध्यक्ष जितेका सागर थापाले भने ।

अध्यक्षमा निर्वाचित अजम्बर राईले भने चुनावी प्रकृयामा स्वस्थ रुपमा उत्रिएको बताउँदै पार्टी एकढिक्का बनाएर लैजाने प्रतिक्रिया दिए ।