विराटनगरको मधुमारास्थित मुनलाइट गर्ल्स होस्टलमा विद्यार्थीमाथि सञ्चालकको दुर्व्यवहार (भिडियो)

विराटनगर । विराटनगर– ८ मधुमारास्थित मुनलाइट गल्र्स होस्टलका संचालकबाट होस्टलमा बस्ने विद्यार्थी माथि दुर्व्यवहार गर्दै बलपूर्वक निकाल्ने प्रयास भएको छ । 

होस्टल सञ्चालिका मधु रेग्मीले होस्टलमा पैसा तिरेर बसेकी एक छात्रामाथि हातपात गर्दै उनले अध्ययन गर्ने किताब कापी समेत फालिदिएकी हुन् ।

सामाजिक सञ्जालमा भाइरल भएको भिडियोमा सञ्चालिका रेग्मीले ती विद्यार्थीलाई चैत महिना नलाग्दै अग्रिम रुपमा पैसा माग्दै गरेको देखिएको छ ।

विद्यार्थीले फागुन महिनाको होस्टल शुल्क दिइसकेको भएपनि सञ्चालिका रेग्मीले चैत महिनाको पनि पहिले नै पैसा मागेकी थिइन् । तर विद्यार्थीले पैसा दिन इन्कार गरेपछि उनले तत्कालै निस्किएर जान भन्दै दुर्व्यवहार गरेकी हुन् ।

रेग्मीले विद्यार्थीको कोठामै प्रवेश गरेर सिरक, तन्ना, ब्लाङ्केट सिरानी समेत फालिदिएको भिडियोमा देखिएको छ । उनले विद्यार्थी माथि गालीगलौज समेत गरेकी छन् ।

होस्टल सञ्चालकको दुर्व्यवहारमा परेकी विद्यार्थी विराटनगर नर्सिङ क्याम्पसमा बिएस्सी विएनएस नर्सिङको पहिलो वर्षकी विद्यार्थी भएको खुलेको छ ।

उनलाई नर्सिङ क्याम्पसले नै उक्त होस्टलमा पठाएको जनाइएको छ ।