मोटरसाइकल दुर्घटनामा दुईको मृत्यु

विराटनगर । झापा र सुनसरी जिल्लाको बिभिन्न स्थानमा मोटरसाइकल दुर्घटना हुँदा दुई जनाको मृत्यु भएको छ ।

शनिबार राति साढे ११ बजे झापाको कमल गाउँपालिका–३ मा बा ६४ प १४०० नम्बरको मोटरसाइकल आफै अनियन्त्रित भई कल्भर्टमा ठोकिएर दुर्घटना हुँदा मोटरसाइकल चालक अर्जुनधारा नगरपालिका–४ का २७ वर्षीय पिरती भन्ने विष्णु लिम्बू र मोटरसाइकलमा पछाडि सवार १५ वर्षीय बिपल नेपाल घाइते भएका थिए ।

घाइते उनीहरूलाई उपचारका लागि बिर्तामोड लगिएकोमा अस्पताल पुर्‍याउन साथ लिम्बूको मृत्यु भएको हो ।

त्यस्तै सुनसरीको बराहक्षेत्र नगरपालिका– ३ मा कालाबञ्जरबाट बाङ्गेतर्फ आउँदै गरेको को ३६ प २५६७ नम्बरको मोटरसाइकल आफै अनियन्त्रित भई नालामा झरी दुर्घटना हुँदा मोटरसाईकल चालक बराहक्षेत्र– ७ का २० वर्षीय सञ्जीव माझीको घटनास्थलमै मृत्यु भएको प्रहरीले जनाएको छ ।

घाइते भएका मोटरसाइकलमा पछाडि सवार २३ वर्षीय विशाल कोइरालाको घोपा धरानमा उपचार भइरहेको बताइएको  छ ।