मोर्डनएराका विद्यार्थीको ‘बाटो बिराएको बादल’ गुरुकुलमा

विराटनगर । विराटनगरस्थित मोर्डनएरा स्कुलका विद्यार्थीहरूले मञ्चन गरेको ‘बाटो बिराएको बादल’ नामक नाटक आरोहण गुरुकुलमा प्रदर्शन गरिएको छ ।

सो विद्यालयको कक्षा ९ मा अध्ययनरत छात्र दिवस न्यौपानेले निर्देशन गरेको उक्त नाटक बुधबार मञ्चन गरिएको हो । विद्यालयका प्रिन्सिपल इन्द्रकुमार राईका अनुसार नाटकका दुईवटा शोहरू सञ्चालन गरिएका छन् । 

रचना सापकोटाले लेखन गरेको सो नाटकको व्यवस्थापन साइमन कार्कीले गरेका हुन् । 

नाटकमा कक्षा ९ का १४ जना विद्यार्थीहरूले अभिनय गरेका छन् । नाटक हेर्न आएका प्याब्सन विराटनगरका अध्यक्ष अर्जुन श्रेष्ठले विद्यार्थीहरूको अभिनय मर्मस्पर्शी र मन छुने रहेको बताए । 

नाटकमा अभिभावकको बेवास्ताका कारण विद्यालय उमेरकी छोरीले भोग्नुपर्ने समस्या र हुनसक्ने दुर्घटनालाई कथाको रूपमा प्रस्तुत गरिएको छ । 

अभिभावकीय जिम्मेवारीको अभाव र प्रशासनको उदासिनताले एउटा निर्दोष छात्राको भविष्य कसरी अन्धकारतर्फ धकेलिन्छ भन्ने विषय नाटकको मुख्य केन्द्रविन्दु रहेको छ ।

प्याब्सन मोरङका वरिष्ठ उपाध्यक्ष मोहन बुढाथोकीले विद्यार्थीहरूले समसामयिक र गहन विषयवस्तुलाई नाटकमार्फत उठान गरेकोमा प्रशंसा गरे । 

स्कुलको २५ औं वार्षिकोत्सवको अवसरमा आयोजित विभिन्न प्रतियोगिताका विजयीहरुलाई पुरस्कारसमेत वितरण गरिएको थियो ।