सातघुम्ती कवाडी आगलागी : बर्न हस्पिटलमा उपचाररत थप एक महिलाको मृत्यु

विराटनगर । विराटनगरको सातघुम्ती मोड रहेको कवाडी संकलन केन्द्रमा भएको आगलागीको घटनामा परेर मृत्यु हुनेको संख्या चार पुगेको छ । जलेर गम्भीर घाइते थप एक महिलाको उपचारकै क्रममा काठमाडौंको कीर्तिपुरस्थित बर्न हस्पिटलमा मृत्यु भएको हो । विराटनगर-६ की ६० वर्षीया रीतादेवी सरदारको सोमबार राती मृत्यु भएको विराटनगर-६ का वडाध्यक्ष अक्षय सहनीले बताए । 

सातघुम्ती रोडमा दुखा मण्डलले सञ्चालन गरेको कवाडी केन्द्रमा गत बुधबार अपरान्ह आगलागी भएको थियो । आगलागीमा परी तीन जनाको यसअघि नै मृत्यु भइसकेको छ । घटनामा गम्भीर घाइते भएकी रीतादेवीसहित विराटनगर-६ का ५८ वर्षीय किशोर पासवान, ६५ वर्षीया सुनिता कामत र कटहरी गाउँपालिका-६ की ३० वर्षीया पिंकी कामतलाई काठमाडौं लगिएकोमा सुनिताको बुधबार नै निधन भइसकेको छ ।

आगलागीमा परी विराटनगर-७ का कवाडी सञ्चालकका परिवारकै ४० वर्षीय दीपक मण्डलको उपचारको क्रममा विराटनगरस्थित न्यूरो हस्पिटलमा मृत्यु भएको थियो । कवाडीभित्रै जलेर विराटनगर-६ की सुशीला पासवान समेत मृत्यु भएको थियो ।

आगलागीमा परी ज्यान गुमाएकाका परिवारलाई विराटनगर महानगरपालिकाले प्रति मृतक एक लाख रुपैयाँका दरले राहत दिने घोषणा गरेको छ । त्यसैगरी घाइतेलाई ५० हजार रुपैयाँ उपलब्ध गराउने निर्णय गरेको छ ।