निर्वाचन कमिटीले टाँस्यो अन्तिम नामवली

विराटनगर । नेकपा एमाले मोरङ १० औं जिल्ला अधिवेशनको निर्वाचन कमिटीले उम्मेदवारको अन्तिम नामवाली टाँस गरेको छ । निर्वाचन कमिटीले मंगलबार दिउँसो ३ बजे अन्तिम नामवली टाँस गरेको हो । सदस्यमा उम्मेदवारी दिएकामा धेरैले फिर्ता लिएका छन् । सदस्यमा उम्मेदवारी दिएकालाई अझै पनि फिर्ता लिने समय दिइने निर्वाचन कमिटीले जनाएको छ । अहिलेसम्म पदाधिकारीतर्फ कसैले पनि उम्मेदवारी फिर्ता लिएका छैनन् । 

निर्वाचन कमिटीले मतपत्र छपाइका लागि उम्मेदवारको सबै विवरण प्रेस पठाइसकेको छ । ‘प्रेसको अन्तिम प्लेट नबनेसम्म हामी उम्मेदवारी फिर्ताको समयमा कायमै छौं’ केन्द्रीय निर्वाचन कमिटीका सदस्य समीर नेपालले भने । उम्मेदवारको धेरै क्लस्टर भएकाले कतिले उम्मेदवारी फिर्ता लिए कतिले कायम राखे गणना गर्न समय लाग्ने उनले बताए । उनले अन्तिम मतपत्र नबनेसम्म उम्मेदवारी फिर्ता भइरहने बताए ।

जारी जिल्ला अधिवेशनमा संस्थापन र इतर समूह गरी दुई समूहले प्यानलै बनाई उम्मेदवारी दिएका छन् । प्यानल बनाई उम्मेदवारी दिन नपाइने पार्टीको केन्द्रको नीति विपरीत दुवै समूहले उम्मेदवारी दिएका हुन् । दुवै समूहले आ–आफ्नो प्यानलको उम्मेदवारको फोटो राखी सामाजिक सञ्जालमा मत माग्न सुरु गरिसकेका छन् ।
संस्थापन पक्ष राजकुमार ओझा नेतृत्वमा चुनावी मैदानमा होमिँदा इतर पक्ष अजम्बर राईको अगुवाईमा प्रतिष्पर्धामा ओर्लिएका छन् । 

अध्यक्षका दुई उम्मेदवारमध्ये प्रदेशका  पूर्वसांसद ओझालाई  कोशी प्रदेशबाट प्रतिनिधित्व गर्ने बहुसंख्यक स्थायी कमिटी सदस्यको साथ छ । अध्यक्षमै उम्मेदवार बनेका जिसस मोरङका प्रमुख अजम्बर राईलाई नेता विनोद ढकालको समर्थन छ । ओझाको टिमबाट उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजवंशी र शिल्पा निराला कार्कीले उम्मेदवारी दिएका छन् । कार्की विराटनगरकी उपमेयर हुन् । 

त्यस्तै, ढकाल समूहबाट अध्यक्ष अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा  सन्तोष वान्तवा र उषा झाले उम्मेदवारी दिएका छन् ।  उषा झा जिसस मोरङकी उपप्रमुख हुन् । एमाले मोरङ जिल्ला कमिटी पदाधिकारीसहित  १६५ सदस्यीय हुनेछ । निर्वाचन कमिटीले उम्मेदवारको अन्तिम नामवली हालसम्म प्रकाशन नगरेकाले मतदान कहिले हुने भन्ने अहिलेसम्म अन्योल छ ।