कोशीलाई हृवील चियर बास्केटबलको उपाधि

इटहरी । प्रथम अन्तरप्रदेश महिला हृवीलचियर बास्केटबल प्रतियोगिताको उपाधि कोशी प्रदेशले जितेको छ । सुनसरीको इटहरीमा शनिबार सम्पन्न फाइनल प्रतिष्पर्धामा लुम्बिनी प्रदेशलाई ५ का विरुद्ध ८ स्कोरले पराजित गर्दै कोशीले उपाधि जितेको हो ।

पहिलो क्वाटरमा २–२ को बराबरी स्कोर जोडेको कोशीले दोस्रो क्वाटरमा २–० को अग्रता कायम गरेको थियो । तेस्रो क्वाटरमा लुम्बिनीसँग ३–२ स्कोरले पछि परेको कोशीले अन्तिम क्वाटरमा २–० को स्कोर निकाल्दै बिजेता बन्न सफल भएको हो ।

स्पाइनल इन्जुरी संघ कोशी प्रदेशको आयोजनामा तथा कोशी प्रदेश खेलकुद विकास बोर्डको मुख्य सहयोगमा सम्पन्न प्रतियोगिताको बिजेता कोशीले उपाधिसँगै नगद २५ हजार पाएको छ । उपबिजेता लुम्बिनीले २० हजार पाएको छ ।

प्रतियोगितामा कोशी प्रदेशकी रजनी राई उत्कृष्ट खेलाडीसँगै हाइस्कोरर घोषित भइन् । दुई दिनसम्म चलेको प्रतियोगितामा मधेश प्रदेशबाहेक ६ वटै प्रदेशको सहभागिता रहेको थियो ।