बन्दसत्रमा बराल दाजुभाइको नोकझोंक

विराटनगर । एमाले मोरङ अधिवेशनको बन्दसत्रमा एमाले उपाध्यक्ष गुरु बराललाई उनकै भाइ भोला बरालले थर्काएका छन् । आइतबार बन्दसत्रमा सहभागी नेताहरूले दिएको जानकारीअनुसार प्रतिनिधि मनोनयनको विषय बन्दसत्रमा विवादको माध्यम बनेको थियो । 

बन्दसत्र चल्दै गर्दा मोरङका उपसचिव सोमराज थापासहितका बहुसंख्यक जिल्ला कमिटीका सदस्यहरू नाराबाजीमा उत्रिए । नाराबाजी गर्नेमध्येका एक नेता थिए, सागर थापा । 

कुल ९११ जना प्रतिनिधिमध्ये ४६ जना प्रतिनिधि जिल्लाले मनोनित गरेको विषयमा विनोद ढकाल पक्षका कार्यकर्ता असन्तुष्ट सुनिन्थे । 

आफूहरूलाई जानकारी नदिई एकपक्षीय रुपमा प्रतिनिधि मनोनित गरिएको भन्दै हालका उपसचिव सोमराज थापाले भने ‘म जिल्ला संगठन कमिटीको उपसचिव, प्रतिनिधिहरू कसरी मनोनित भए मलाई सुइँकोसम्म दिइएन । यसरी मापदण्ड मिचेर गरिएको मनोनयन हामीलाई स्वीकार्य छैन ।’ 

उनले यति भनेपछि हलमा नाराबाजी सुरु भयो । आफ्ना प्रतिनिधि धेरै भएकाले सिंगो हलले विरोध गरेको ढकाल पक्षको दाबी छ । 

यही क्रममा यसपटक ढकाल पक्षबाट जिल्ला कमिटी उपाध्यक्षको उम्मेदवार बनेका  सागर थापा नारा लगाइरहेका थिए । मञ्चमा बसेका एमाले उपाध्यक्ष गुरु बरालले उनलाई रोक्न खोजे । 

‘सागर, ए सागर, यो भएन । यो त अराजकता भयो’, उपाध्यक्ष बरालले भने । 

उनले यसो भन्नासाथ अर्का कार्यकर्ता भोला बराल जुरुक्क उठे, र उपाध्यक्ष बरालको प्रतिवाद गरे, ‘कार्यकर्ताले बोल्नासाथ अराजकता हुन्छ ? नेताले जे पायो त्यही गर्दा अराजकता हुँदैन ?’ उपाध्यक्ष बराल नाजवाफ जस्तै भए । 

आफ्नै सहोदर भाइले त्यसरी प्रतिवाद गरेपछि उपाध्यक्ष बराल मौन रहे । नारा लागिरह्यो । केहीबेरमा बन्दसत्र स्थगित भएको थियो ।