मुख्य योग शिक्षक प्रशिक्षणमा सहभागी टोली नेपाल फर्कियो

विराटनगर ।  पतञ्जली योगपीठ हरिद्वारमा आयोजित सातदिने मुख्य योग शिक्षक प्रशिक्षण शिविरमा सहभागी भएर विराटनगर महानगरको टोली शनिबार विराटनगर आइपुगेको छ ।

 कार्तिक २१ गतेदेखि २७ गतेसम्म भारतको उत्तराखण्डस्थित पतञ्जली योगपीठ हरिद्वारको समृद्ध ग्राममा आवासीय मुख्य योग प्रशिक्षण आयोजना गरिएको थियो सो प्रशिक्षणमा विराटनगर महानगर समितिका अध्यक्ष माधव अधिकारी र पतञ्जली योग समिति मोरङका अध्यक्ष जयधर्म आचार्यसहित जिल्लाबाट जम्मा ४० जना सहभागी भएका थिए ।

प्रशिक्षणमा योगऋषि स्वामी रामदेव, आयुर्वेद शिरोमणि आचार्य बालकृष्ण, साध्वी देवादिती, नेपालका केन्द्रीय प्रभारी लवदेव मिश्र लगायतका वरिष्ठ योग गुरुहरूले प्रशिक्षण दिएका थिए ।

समापन समारोहमा आचार्य बालकृष्णले नेपालको वर्तमान अवस्थाका कारण देश पछि परेकोमा दुःख व्यक्त गरे । उनले ‘हामीले नेपाल र नेपालीकै लागि केही गर्न खोजेका हौं, तर कमिशन र भ्रष्टाचारले गर्दा कुनै पनि काम अगाडि बढ्न सकेन,’ भनी आफ्नो धारणा राखे ।

त्यसैगरी, नेपालका केन्द्रीय प्रभारी लवदेव मिश्रले पतञ्जलीले नेपालमा केही गरौं भनेर जग्गा लिएको भए पनि राजनीतिक प्रतिशोधका कारण मुद्दा हालेर कामलाई अगाडि बढ्न नदिएको बताए । उनले ‘न सरकारी पैसा, न त सरकारी जग्गाको अपचलन नै हो, पतञ्जलीकै पैसाबाट नेपालमै केही गरौं भन्दा पनि विभिन्न समूहले रोक्नुले हाम्रा नेताहरूले योग र आयुर्वेदलाई बुझ्न नसकेकोमा दुःख लाग्छ,’ भनी आफ्नो भनाइ राखे ।

प्रशिक्षण कार्यक्रममा केन्द्रीय सदस्य लवराज भट्ट, लोकनाथ खनाल, कोशी प्रदेश प्रभारी मिस्टरप्रसाद चौधरी, आजीवन सदस्य चन्द्रमणि गुरागाईं लगायतको सहभागिता र थियो । दोस्रो लामो  प्रशिक्षण कार्यक्रममा  कोशी प्रदेश, मधेश प्रदेश , गण्डकी   प्रदेश  कर्णाली  प्रदेश र कञ्चनपुर जिल्ला गरी ५ सय  जनाको सहभागिता थियो ।