सडक सौन्दर्यीकरणका लागि स्टाण्डर्ड चार्टर्ड बैंकले महानगरलाई दियो दुइ लाख

विराटनगर, २ असोज । विराटनगरको बरगाछी–रानी सडक सौन्दर्यीकरण परियोजनाका लागि स्टाण्डर्ड चार्टर्ड बैंकले पनि सहयोग रकम प्रदान गरेको छ । बैंकले बुधबार  विराटनगर महानगरकी कार्यबाहक मेयर शिल्पा निराला कार्कीलाई २ लाख रुपैयाँ बराबरको चेक हस्तान्तरण गरेको हो । 

बैंककी प्रदेश प्रमुख शर्मिला हुमागाईंसहितको टोलीले कार्यबाहक मेयर कार्कीलाई चेक हस्तान्तरण गरेको हो । वडा नम्बर १ का अध्यक्ष काजीबहादुर बस्नेत, ११ का वडाध्यक्ष तीर्थेन्द्र नेउपाने र महानगरका तर्फबाट सौन्दर्यीकरणको संयोजन गरिरहेका सरसफाई शाखा प्रमुख पुनमकुमार दाहालसमेतको उपस्थितिमा बैंकले महानगरको सडक सौन्दर्यीकरणका लागि सहयोग रकम हस्तान्तरण गरेको थियो । हालसम्म १८ लाख ५० हजार रुपैयाँ परियोजनाको खातामा जम्मा भइसकेको बताइएको छ । 

सो सडकको सौन्दर्यीकरणका लागि ५५ लाख रुपैयाँको लागत अनुमान गरिएको छ । यसअघि एनआईसी, एनआईएमवी, नेपाल बैंक, ग्लोबल आइएमई, कुमारी बैंक, सानिमा बैंक, कृषि विकास बैंक, एनएमवी बैंक, छिमेकी लघुवित्त र जीवन विकास लघुवित्त वित्तीय संस्थाले रकम जम्मा गरिसकेका छन् ।

सो सडकको सौन्दर्यीकरणका लागि सहयोग संकलन गर्न महानगरले बैंकर्स एसोसिएसनका प्रदेश अध्यक्ष सन्तोष बुढाथोकीको संयोजकत्वमा आर्थिक संकलन समिति गठन गरेको थियो । 

हाल सडकका डिभाइडरमा तारजाली लगाएर फूल रोप्ने कार्य भइरहेको छ । बरगाछीदेखि महेन्द्र चोकसम्मका सबै मेडिएम (डिभाइडर) मा तारजाली लगाइसकिएको महानगरका तर्फबाट सौन्दर्यकरणको संयोजन गरिरहेका दाहालले जानकारी दिए । अब बरगाछी–महेन्द्रचोकका केही डिभाइडरमा मात्रै फूल रोप्न बाँकी छ ।

संविधान दिवसका अवसरमा असोज ३ गते बिहीबार बाँकी रहेका डिभाइडरमा पनि फूल रोप्ने कार्यक्रम राखिएको उनले बताए । परियोजनालाई पारदर्शी र व्यवस्थित बनाउन उद्योगी तथा समाजसेवी बनीगोपाल मुन्दडाको संयोजकत्वमा महानगरले गठन गरेको समितिले हाल सौन्दर्यीकरण अभियानलाई तीव्रता दिइएको छ ।