दलेलीमा बन्यो १० कोठे विद्यालय भवन

विराटनगर । मोरङको कानेपोखरी गाउँपालिका–२ दलेलीस्थित शिक्षा विकास माध्यमिक विद्यालयमा १० कोठे भवन निर्माण गरिएको छ । उक्त भवनको बुधबार सार्वजनिक लेखा समिति सभापति ऋषिकेश पोखरेलले एक कार्यक्रमका बीच उद्घाटन गरेका छन् । 

पोखरेलले उक्त विद्यालयलाई नमुना विद्यालयका रुपमा विकास गर्ने गरी काम गर्न र त्यसका लागि आफूले पनि सहयोग गर्ने बताए । उनले गुणस्तरीय शिक्षा प्रदान गर्न समेत विद्यालय प्रशासनलाई आग्रह गरे । 

दुई करोड ७३ लाखको लागतमा विद्यालय भवन निर्माण सम्पन्न भएको गाउँपालिकाकी अध्यक्ष राजमती इङनामले बताइन् । विद्यालय भवन उद्घाटन कार्यक्रममा गाउँपालिकाका उपाध्यक्ष भोला अधिकारी, वडा नम्बर २ का वडाध्यक्ष सुशील बुढाथोकीलगायत शिक्षासेवी, स्थानीय अभिभावक र विद्यार्थीहरु लगायतको उपस्थिति थियो ।