नवजात शिशुलाई उपहार

विराटनगर । सुत्केरीलाई उपहार दिने चलन पुरानो भएकाले एक अन्तर्राष्ट्रिय कम्पनीले जवजात शिशुलाई उपहार दिन थालेको छ । हिमालय वेलनेश कम्पनीले कोशी प्रदेशका लागि विराटनगरबाट यस्तो उपहार सुरू गरेको छ ।

नवजात शिशुका लागि अति आवश्यक र जाडो महिनामा चाहिने वस्तु सुत्करी आमालाई अस्पतालमै गएर दिने गरिएको छ । 

विराटनगरको मेट्रो न्यूरो मकालु अस्पतालमा रहेका नवजात शिशुका सुत्केरी आमालाई उपहार दिएर नयाँ सेवा सुरू गरेको हिमालयले प्रदेशभरी उपहारका कार्यक्रम लैजाने भएको छ ।

उपहारमा शिशुलाई गरिने मसाज तेल, पाउडर, सेम्पो, साबुनलगायतका सामग्री छन् ।

हिमालय कम्पनीका प्रतिनिधि सुबोध दाहालले अस्पतालको शय्यामा रहेका शिशुलाई उपहार दिंदै आमा र बच्चाको स्वास्थ्य लाभको कामना गरे । ‘कम्पनीको मानवीय सेवा गर्ने उद्देश्यलाई पूरा गर्न शिशु र सुत्केरीलाई खुसी बनाउन अस्पतालमै गएका हौं’ दाहालले भने । 

मेट्रो न्युरो अस्पतालका मेट्रोन ममता महतले उपहार दिने कम्पनीलाई सम्मान गर्दै नेपालका सबै शिशुसम्म उपहार पुग्नु पर्ने माग गरिन् ।

हिमालय कम्पनीले नर्सहरूलाई पनि सम्मान गर्दै आएको छ । अस्पतालमा रहेर शिशुको स्याहारमा २० वर्ष कटाएका नर्सिङ कर्मचारीलाई सम्मान गर्दै आएको कम्पनीले नर्सिङ स्वास्थ्य कार्यक्रम पनि सञ्चालन गर्दै आएको छ । 

दाहालका अनुसार नवजात शिशुको स्वास्थ्यमा अन्तर्राष्ट्रिय मापदण्ड पूरा गर्नु पर्ने विषयमा नर्सिङ स्वास्थ्य कार्यक्रम चलाइने गरिएको छ । 

शिशु स्वास्थ्यका लागि सबै आवश्यक वस्तु उत्पादन गर्दै आएको हिमालयले सामाजिक कार्यमा पनि लगानी गर्दै आएको दाहालले बताए ।