एम्बुलेन्समा लुकाएर गाँजा ओसार पसार, भेडेटारबाट ५२ केजी बरामद

विराटनगर । एम्बुलेन्समा लुकाएर ल्याउँदै गरेको ५२ केजी गाँजासहित प्रहरीले भेडेटारबाट एम्बुलेन्स चालकलाई पक्राउ गरेको छ । 

धनकुटाको साँगुरीगढी गाउँपालिका–६ भेडेटारबाट विराटनगर महानगरपालिका–८ का ४८ वर्षीय चालक जयदेव चेल पक्राउ परेका हुन् । 

इलाका प्रहरी कार्यालय भेडेटारको टोलीले धनकुटाबाट धरानतर्फ आइरहेको मे १ च २०३२ नम्बरको एम्बुलेन्सलाई  रोकेर चेकजाँचगर्दा उक्त एम्बुलेन्सभित्र लुकाई राखेको ५२ केजी गाँजा बरामद गरेको हो । 

लागुऔषध गाँजा बरामद भएसँगै चालक चेललाई शनिबार साँझ पक्राउ गरिएको र घटना सम्बन्धमा थप अनुसन्धान भइरहेको जिल्ला प्रहरी कार्यालय धनकुटाले जनाएको छ । 

दुइ साताअघि पनि भेडेटारबाट इन्धन बोक्ने टयाङ्करमा लुकाएर ल्याउँदै गरेको करिब ६ क्विन्टल गाँजा बरामद भएको थियो । प्रहरीले त्यतिबेला चार जनालाई पक्राउ गरेको थियो ।