उर्लाबारी आगलागीमा ज्यान गुमाउनेको संख्या ४ पुग्यो, घरधनीको पनि मृत्यु

विराटनगर, ९ मंसिर : मोरङको उर्लाबारी नगरपालिका–७ बरगाछीमा कात्तिक २६ गते राती साढे १० बजेको समयमा भएको आगलागीका क्रममा घाइते भएका घरधनी ६८ वर्षीय रुकुम बहादुर कार्कीको मृत्यु भएको छ । 

आगो नियन्त्रणका क्रममा ग्यास सिलिण्डर बिस्फोट हुँदा आगोको लप्काले जलेर गम्भीर घाइते भएका कार्कीको काठमाडौंस्थित बर्न हस्पिटलमा उपचारका लागि शनिबार विहान ५ बजे मृत्यु भएको जिल्ला प्रहरी कार्यालय मोरङले जनाएको छ । उक्त घटनामा घरधनी कार्कीसहित हालसम्म चारजनाको मृत्यु भएको छ ।

मृतक कार्कीको शरिरको ४० प्रतिशत भाग जलेको थियो । उनका छोरा दीपक कार्कीले आफ्नै घरमा संचालन गरेको स्नेहा ज्वेलर्समा आगलागी हुँदा आगो नियन्त्रण लिने क्रममा ४ जना प्रहरीसहित २८ जना घाइते भएका थिए । घाइतेहरु मध्ये २४ जनालाई नेपाली सेनाको जहाजबाट किर्तिपुरस्थित बर्न हस्पिटल पु¥याइएको थियो । हस्पिटलको सघन उपचार कक्षमा अझै ७ जनाको उपचार भइरहेको जनाइएको छ ।

गत मंगलबार बिहान उपचारको क्रममा उर्लाबारी–७ मै बसोबास रहेका ४३ वर्षीय भारतीय नागरिक तपन पण्डितको उपचारकै क्रममा निधन भएको थियो । सोही ठाउँका ५० वर्षीय हेमकुमार दाहालको बुधबार राती साढे १० बजे र ५० वर्षीय कुमार तामाङको बिहीबार बिहान निधन भएको हो ।