एसइई नतिजामा पोखरिया मावि देशभरकै सर्वोत्कृष्ट

विराटनगर । एसइई परीक्षाको नतिजामा विराटनगरको पोखरिया माध्यमिक विद्यालय देशभरकै  सर्वोत्कृष्ट विद्यालय घोषित भएको छ ।

विद्यालयबाट अघिल्लो शैक्षिक सत्रमा माध्यमिक तर्फको एसइई परीक्षामा सहभागी भएका ३६० जना विद्यार्थीहरू मध्ये ७४ दशमलव ४४ प्रतिशत विद्यार्थीहरूले औसत स्तरीकृत अङ्क (जिपिए) ३ दशमलव २ वा सो भन्दा माथि प्राप्त गरेको भन्दै देशभरबाट सर्वोत्कृष्ट घोषित भएको हो ।

कम्तिमा १०० भन्दा बढी विद्यार्थीहरू सहभागी गराएर जिपिए ३ दशमलव २ वा सो भन्दा माथि प्राप्त गर्ने देशभरका १५ वटा विद्यालयहरू रहेका छन् । आइतबार सार्वजनिक भएको आर्थिक बर्ष २०८०–८१ को आर्थिक सर्वेक्षण प्रतिवेदन अनुसार पोखरिया मावि देशभरमै उत्कृष्ट नतिजामा पहिलो भएको उल्लेख छ ।

पोखरियासँगै कोशी प्रदेशबाट खोटाङको सरस्वती मावि दिक्तेल चौथो स्थानमा रहेको छ । सरस्वती माविबाट एसइई परीक्षामा सहभागी भएका १७५ जना विद्यार्थीहरू मध्ये ६१ दशमलव १४ प्रतिशतले जिपिए ३ दशमलव २ र सो भन्दा माथिको नतिजा हासिल गरेका हुन् ।

आर्थिक सर्वेक्षण अनुसार विराटनगरको आदर्श मावि पनि उत्कृष्ट नतिजाका लागि १२ औं स्थानमा परेको छ । आदर्शबाट एसइईमा सहभागी भएका ३७५ जना विद्यार्थीहरू मध्ये ३९ दशमलव ४६ प्रतिशत विद्यार्थीहरूले जिपिए ३ दशमलव २ भन्दा माथि प्राप्त गरेको जनाइएको छ ।

सुकुना माविमा ४ हजार बढी विद्यार्थी

आर्थिक सर्वेक्षण अनुसार विद्यालय व्यवस्थापन, नेतृत्व, लगानी र गुणस्तरमा भएको वृद्धिका कारण सामुदायिक विद्यालयमा विद्यार्थीको आकर्षण बढ्दै गएको उल्लेख छ । सोही कारण देशभरका सामुदायिक विद्यालयहरू मध्ये मोरङको सुन्दरहरैंचास्थित सुकुना माविमा विद्यार्थीहरूको संख्या ४ हजार बढि रहेको जनाइएको छ ।

शैक्षिक सत्र २०८० मा सुकुना माविमा कुल चार हजार ९६ विद्यार्थीहरू अध्ययनरत रहेको जनाइएको छ ।

विद्यार्थी संख्याका आधारमा देशभरका सबैभन्दा धेरै विद्यार्थी हुने १५ वटा विद्यालयहरू मध्ये सुकुना मावि नवौं स्थानमा रहेको छ । 

कोशी प्रदेश अन्तरगत कै झापाको मेचीनगरस्थित धुलाबारी मावि पनि १५ वटा विद्यालयभित्र परेको छ । उक्त विद्यालयमा ३ हजार ५८० विद्यार्थी अध्ययनरत रहेको जनाइएको छ ।

सामुदायिक विद्यालयमा विद्यार्थी भर्ना दर ६९ दशमलव ९ प्रतिशत तथा संस्थागत विद्यालयमा ३० दशमलव १ प्रतिशत रहेको  आर्थिक सर्वेक्षणमा उल्लेख छ ।