ग्रामथान गाउँपालिकाको अध्यक्षमा माओवादीका नमो नारायण माझी निर्वाचित

विराटनगर । मोरङको ग्रामथान गाउँपालिकाको अध्यक्षमा नेकपा माओवादी केन्द्रका नमो नारायण माझी निर्वाचित भएका छन् । 

भर्खरै सम्पन्न मतगणनाको अन्तिम मत परिणाम अनुसार माझीले ६ हजार ९६९ मत प्राप्त गरी निर्वाचित भएका छन् । 

नेपाली कांग्रेसका बलराम सरदार थारुले ५ हजार ३३३ मत प्राप्त गर्दा नेकपा एमालेका तुलसी राम विश्वासले ४ हजार १५९ मत प्राप्त गरेका छन् ।

२०७९ को स्थानीय तह निर्वाचनमा नेपाली कांग्रेसका जय प्रकाश चौधरी थारु निर्वाचित भएका थिए । उनको निधनपछि भएको उपनिर्वाचनमा माओवादीका माझी विजयी भएका हुन् ।

अघिल्लो निर्वाचनमा दोस्रो स्थानमा रहेको एमाले भने यसपटक तेस्रो बन्न पुगेको छ । 

नेपाली कांग्रेसबाट माओवादीमा प्रवेश गरेका माझीलाई दुई महिना अघि नै माओवादीले उम्मेदवार घोषणा गरेको थियो । बेलैमा उम्मेदवारी घोषणा भएको फाइदा उठाउँदै माझी चुनावी प्रचार प्रसारमा मतदाताको घरदैलोमा जुटेका थिए ।

आइतबार राती करीव साढे १० बजेदेखि मतगणना गरिएको थियो । माझीले गणनाको सुरुवातीदेखि नै अग्रता कायम गरेका थिए ।