बजेट कार्यान्वयन भए आगामी वर्ष ५.३ प्रतिशत आर्थिक बृद्धि

विराटनगर । संघीयताको अभ्यासयताका सात वर्षमा कोशी प्रदेशको बजेट कार्यान्वयनबाट प्रदेशको औषत आर्थिक बृद्धिदर ४ प्रतिशत कायम भएको छ । प्रदेश सरकार गठन भएदेखि हालसम्मको अवधिमा कोशी प्रदेशको आर्थिक बृद्धि औषत ४ प्रतिशत रहेको प्रदेश सरकारको दाबी छ ।

चालु आर्थिक वर्षमा देशको समग्र आर्थिक वृद्धिदर ४.६१ प्रतिशत हुँदा कोशी प्रदेशको भने ३.३४ प्रतिशत पुग्ने अनुमान गरिएको छ ।

कोशी प्रदेश सरकारले आइतबार मात्रै आर्थिक बर्ष २०८२–८३ का लागि ३५ अर्ब ८७ करोड ९९ लाख रुपैयाँको बजेट प्रस्तुत गरेको छ । 

उक्त बजेटको कार्यन्वयनबाट २०८२–८३ मा प्रदेशको आर्थिक बृद्धिदर ५ दशमलव ३ पुग्ने आर्थिक मामिला तथा योजनामन्त्री रामबहादुर मगरले बताए । 

कोशी प्रदेशमा आर्थिक वर्ष २०७६–७७ मा ५ खर्ब ९६ अर्ब कायम रहेको कुल गार्हस्थ्य उत्पादन आर्थिक वर्ष २०८१–८२ सम्म बृद्धि भएर ९ खर्ब ७० अर्ब ७४ करोड पुग्ने बताए ।

आर्थिक वर्ष २०८१–८२ कुल ग्राहस्थ्य उत्पादनमा कृषि क्षेत्रको योगदान भन् ३४.०५ प्रतिशत रहने उनले बताए । त्यस्तै सेवा र उद्योग क्षेत्रको योगदान क्रमशः ४९.९ प्रतिशत र १६.०५ प्रतिशत रहने अनुमान प्रस्तुत गरेका छन् । 

कोशी प्रदेशमा आर्थिक वर्ष २०७५–७६ मा प्रतिव्यक्ति आय १०२४ अमेरिकी डलर रहेकोमा आर्थिक वर्ष २०८१–८२ मा १४०१ अमेरिकी डलर पुगेको सरकारको दाबी छ । 

निरपेक्ष गरिबीको रेखामुनि रहेको जनसंख्या राष्ट्रिय औषत २०.२७ प्रतिशतभन्दा कम अर्थात् १७.२ प्रतिशत रहेको छ ।

धनी र गरिब बीचको खाडल मापन गर्ने सम्पत्तिमा आधारित गिनी गुणक अंक आर्थिक वर्ष २०७५–७६ मा ०.३५ रहेकोमा आर्थिक वर्ष २०८१–८२ मा ०.३० पुगेको सरकारको भनाइ छ । यसले कोशी प्रदेशमा आय असमानता क्रमशः कम हुँदै गएको जनाइएको छ ।