सेफ्टीट्यांकीभित्र मृत भेटिए दुई जना

विराटनगर । सुनसरीको दुहबीमा निर्माणाधीन घरको सेफ्टी ट्याङ्कीभित्र  दुई जनाको शव फेला परेको छ । दुहबी नगरपालिका–२ का ५० वर्षीय श्यामबहादुर तामाङ र ३२ वर्षीय रमेश राईको शव बुधबार बिहान भेटिएको हो ।

सुनसरी प्रहरीका प्रवक्ता डीएसपी योगराज खतिवडाका अनुसार उनीहरूको शव बुधबार बिहान १० बजे फेला परेको हो । 

‘दुहबी नगरपालिका–४ शिव मन्दिर चोकमा चन्द्रिका रौनियारको नयाँ बन्दै गरेको घरको सेफ्टी ट्यांकीभित्र शव भेटिएको छ’ डीएसपी खतिवडाले भने ‘मृतकमध्ये श्यामबहादुर पेटी ठेकेदार हुन् । राई मजदुर हुन् ।’

उनीहरूको ज्यान सेफ्टीट्याङ्कीभित्र निस्सासिएर गएको हो कि अन्य कारणले अनुसन्धान सुरू भएको प्रहरी भनाइ छ । फरेन्सिक विज्ञसहितको टोली परिचालन भएको प्रहरी भनाइ छ ।