उमागौरी सहकारी प्रकरण : अर्की प्रतिवादी पनि धरौटीमा रिहा

विराटनगर । मोरङ धनपालथान–४ को उमागौरी कृषि सहकारी संस्थाको  रकम अपचलन प्रकरणकी अर्की एक जना प्रतिवादी बिहीबार अदालतबाट धरौटीमा छुटेकी छन् । 

सहकारीकी पूर्व सहसचिव रहेकी धनपालथान–६ की लक्ष्मीकुमारी कार्की राजवंशीलाई मोरङ जिल्ला अदालतका न्यायाधीश चित्रबहादुर गुरुङको इजलासले ५० हजार रुपैयाँ धरौटीमा रिहा गर्न आदेश दिएको हो । 

जिल्ला अदालतका श्रेस्तेदार मणि पोखरेलले दिएको जानकारी अनुसार उनी बिहीबार धरौटी बुझाएर छुटेकी हुन् । 

उमागौरी सहकारीको रकम हिनामिना प्रकरणमा २६ जनाविरूद्ध मुद्दा दायर भएको छ । २६ मध्ये हालसम्म ४ जना अदालतमा हाजिर भएका छन् । तीमध्ये एक जना रोशन राजवंशी पुर्पक्षका लागि थुनामा छन् भने बाँकी तीन जना धरौटीमा छुटेका छन् । 

अञ्जला कोइराला, सन्तलाल खवास र लक्ष्मी कार्की राजवंशी भने धरौटीमा छुटेका हुन् । 

प्रतिनिधिसभा सार्वजनिक लेखा समिति सभापति ऋषिकेश पोखरेलकी पत्नीसमेत रहेकी सहकारीकी पूर्व सञ्चालक सदस्य अञ्जला कोइराला १० लाख धरौटीमा रिहा हुँदा रंगेली–२ का वडाध्यक्ष सन्तलाल खवास ५ लाखमा र राजवंशी ५० हजार धरौटीमा रिहा भएका हुन् । 

उमागौरीको रकम हिनामिना प्रकरणमा बिगोसहित २२ करोड ४८ लाख २७ हजार ७ सय रुपैयाँ २० पैसा आर्थिक हिनामिना भएको अभियोगपत्रमा उल्लेख छ । 

एउटै सहकारी ठगीको एकै मुद्दामा अदालतले रोशन राजवंशीलाई  पुर्पक्षका लागि थुनामा पठाउदा अन्य तीन जनालाई भने छाडेको छ ।