मिल्स र बेलबारी विजयी

विराटनगर । मोरङ जिल्ला स्तरीय बी डिभिजन क्रिकेट प्रतियोगिताअन्तरगत बिहीबार विराटनगरको वैजनाथपुर क्रिकेट मैदानमा भएको खेलमा मिल्स क्रिकेट क्लब विराटनगर र बेलबारी विजयी भएका छन् ।

पहिलो खेलमा मिल्सले कटहरी राइजिङ क्रिकेट क्लबलाई २ रनले पराजित गरेको छ ।

टस जितेर ब्याटिङ गरेको मिल्सले निर्धारित २० ओभरमा ९ विकेट गुमाई १ सय ११ रन बनाएको थियो । जसमा अभय कुर्मीले २४ रन बनाउँदा पृथ्वी सुब्बाले १८ रन बनाए । कटहरीका नितेश सहनी र राहुल मण्डलले २–२ विकेट लिए ।

१ सय १२ रनको विजयी लक्ष्य पाएको कटहरीले निर्धारित ओभरमा ५ विकेट गुमाई १ सय ९ रन बनायो । जसमा म्यान अफ द म्याच सुनिल यादवले अविजित ५२ रनको योगदान दिए । मिल्सका आयुस श्रेष्ठ र रुफेश केतवालले २–२ विकेट लिए ।

दोस्रो खेलमा बेलबारी क्रिकेट क्लबले मेरिल्याण्ड त्रिकेट क्लब विराटनगरलाई ७ रनले पराजित गरेको छ । टस जितेर ब्याटिङ गरेको वेलबारीले निर्धारित २० ओभरमा ७ विकेट गुमाई १ सय १३ रन बनाएको थियो । जसमा शंकर तामाङले २५ रन बनाउँदा  प्रवि खडकाले १८ रन बनाए ।

विराटनगरका विवेक झा र शशिशेखर झाले  समान तीन तीन विकेट लिए ।

१ सय १४ रनको विजयी लक्ष्य पाएको विराटनगरले निर्धारित ओभरमा ९ विकेट गुमाई १ सय रन बनायो ।

जसमा कृष्ण देवले सर्वाधिक २९ रनको योगदान दिए । वेलबारीका रविन खडका र निश्चल बुढाथोकीले २–२ विकेट लिए ।