आमसञ्चार विधेयक प्रदेशसभामा पेश गर्न मन्त्रिपरिषद्को स्वीकृति

विराटनगर । कोशी प्रदेश सरकारले प्रदेश आमसञ्चार विधेयकलाई प्रदेशसभामा पेश गर्न स्वीकृति प्रदान गरेको छ । बुधबार बसेको प्रदेश मन्त्रिपरिषद् बैठकले आमसञ्चार विधेयकलाई प्रदेशसभामा पेश गर्न स्वीकृति दिने निर्णय गरेको सरकारका प्रवक्ता एवं आन्तरिक मामिला तथा कानुन मन्त्री रेवतीरमण भण्डारीले जानकारी दिए ।

बैठकले प्रदेश भवन ऐन, २०७६ लाई संशोधन गर्न बनेको विधेयक समेत प्रदेशसभामा पेश गर्ने निर्णय गरेको उनले बताए । 

मन्त्री भण्डारीका अनुसार मन्त्रिपरिषद् बैठकले प्रदेश सरकार स्थापना भएको दिन फागुन ३ लाई भव्यताका साथ मनाउने गरी कार्यक्रम तयार गर्ने निर्णय गरेको छ ।

सरकारले बुढीगंगा ट्रक पार्किङ स्थल निर्माण तथा सञ्चालन कार्यविधि स्वीकृत गरेको जनाइएको छ । भूमिगत जल सि“चाइ आयोजना कार्यान्वयन कार्यविधि र रोजगार प्रवद्र्धन कार्यक्रम कार्यान्वयन कार्यविधि पनि स्वीकृत गरेको मन्त्री भण्डारीले बताए । 

त्यसैगरी विद्यालय नर्सिङ सेवा कार्यक्रम सञ्चालन कार्यविधि संशोधनसहित कानुन न्याय तथा प्रदेश मामिला समितिमा छलफलका पेश गर्ने मन्त्रिपरिषद् बैठकले निर्णय गरेको छ । 

बैठकले मोरङको बेलबारी नगरपालिका–२ स्थित जनयुद्ध स्मृति प्रतिष्ठानलाई जग्गा रजिस्ट्रेसन शुल्कमा ५० प्रतिशत छुट दिने समेत निर्णय गरेको छ ।

प्रदेश सरकारले प्रदेश निजामती सेवाको ११औं तहमा बढुवा भएका प्रकाशकुमार डाँगी, सुशीलकुमार अधिकारी, डाक्टर इन्द्रप्रसाद सापकोटा, कृष्णप्रसाद पोखरेल र ज्ञानबहादुर बस्नेतलाई विभिन्न कार्यालयमा पदस्थापन गर्ने निर्णय जनाइएको छ ।