नेप्सेमा दोहोरो अंकको वृद्धिले सेयर बजार हरियाली, सवा १६ अर्बको कारोबार

काठमाडौं । बैंकहरुले ब्याजदर घटाउँदा उत्साहित कारोबारीले सोमबार पनि सेयर बजार उचालेका छन् ।

नेप्से परिसूचक दोहोरो अंकले बढेको छ भने कारोबार रकम १६ अर्ब रुपैयाँ नाघेको छ । नेप्से २१.७६ अंकले बढ्दै २८९२.७२ विन्दुमा रहँदा १६ अर्ब ३२ करोड ७१ लाख रुपैयाँको कारोबार भएको छ ।

कारोबारमा आएका सबै समूहको सूचक हरियो भएको छ । लघुवित्त सर्वाधिक १.९३ प्रतिशतले बढेको छ। यस्तै अन्य १.८४, निर्जीवन बीमा १.२७ र विकास बैंक १.४२ प्रतिशतले बढेको छ ।

९६ कम्पनीको सेयरमूल्य घट्दा तीन विकास बैंकका लगानीकर्ता बढी नोक्सानमा रहे ।

ग्रीन र सप्तकोशी डेभलपमेन्ट बैंकको सेयरमूल्य घटेर नेगेटिभ सर्किट लागेको छ भने कर्पोरेट डेभलपमेन्ट बैंक ९.९६ प्रतिशतले घटेको छ ।

१५३ कम्पनीको सेयरमूल्य बढेको छ । थ्री स्टार हाइड्रोपावर ९.९९, ट्रेड टावर ९.९८, सान्भी इनर्जी ९.९८ र उन्नति सहकार्य लघुवित्त ९.४० प्रतिशतले बढेको छ ।

नेपाल पुनर्बीमा कम्पनीको ७५ करोड ६६ लाख रुपैयाँको सेयर कारोबार भएको छ ।

यस्तै हिमालयन पुनर्बीमा कम्पनीको ७५ करोड २८ लाख, बुटवल पावर ५६ करोड ७९ लाख र फर्स्ट माइक्रो फाइनान्स लघुवित्तको ५६ करोड ७९ लाख रुपैयाँको सेयर किनबेच भएको छ ।

यसअघि आइतबार सेयर बजारमा ११ महिनायताकै सर्वाधिक कारोबार भएको थियो। नेप्से परिसूचक ०.३२ अंकले बढेर २८७०.९५ अंकमा रहँदा २१ अर्ब ४६ करोड ४९ लाख रुपैयाँको सेयर किनबेच भएको थियो ।