रामेछापमा मध्यरातमा पहिरो खस्दा ११ जना बेपत्ता

विराटनगर । रामेछाप दोरम्बा शैलुङ गाउँपालिका–३ लेकखर्क बस्तीमा शनिबार राती भएको भीषण पहिरोले बगाएर ११ जना बेपत्ता भएका छन् । पहिरोले चारवटा घर बगाएको जनाइएको छ ।

राती करिव ११ बजेर ४५ मिनेटतिर बस्ती माथिबाट पहिरो खस्दा उनीहरु बेपत्ता भएको जनाइएको छ ।

पहिरोले घट्टे खोला थुनिएर एकैचोटी खोलिँदा वडा नम्बर २ र ३ जोड्ने पक्की पुल  र दर्जनौं स्थानमा सडक बगाएको छ । 

पुल बगाएपछि उद्धार कार्यका लागि प्रभावित क्षेत्रमा पुग्न कठिनाइ भएको रामेछाप प्रहरीले जनाएको छ ।

जिल्ला प्रहरी कार्यालय रामेछापका प्रहरी नायब उपरीक्षक प्रदीप कुमार सिंहले पहिरो प्रभावित क्षेत्रमा सदरमुकाम मन्थली र नजिकका प्रहरी युनिटबाट प्रहरी खटिइसकेको जानकारी दिए ।