भेडेटारबाट समातियो सात क्विन्टल गाँजा

विराटनगर । प्रहरीले भेडेटारबाट गाँजा पक्राउ गर्ने क्रम रोकिएको छैन । साँगुरीगढी गाउँपालिका–६ स्थित भेडेटार बजारबाट सोमबार दिउँसो पनि प्रहरीले सात क्विन्टल बढी परिमाणको गाँजा बोकेको ट्रक र त्यसका चालकलाई नियन्त्रणमा लिएको हो ।

धनकुटाबाट तरकारी बोकेको ना ८ ख १२६८ नम्बरको एउटा मालबाहक ट्रकबाट ७ सय ३६ केजी गाँजा भेडेटार प्रहरीले अपरान्ह तीन बजे बरामद गरेको जनाइएको छ ।

उक्त परिमाणको गाँजा तरकारीको बोराभित्र लुकाएर राखिएको अवस्थामा फेला पारेको भेडेटार प्रहरीले जनाएको छ ।

प्रहरीले ट्रकका चालक धनकुटाको पाख्रिबास नगरपालिका–१० का सुजन भनिने टंक बहादुर मगरलाई नियन्त्रणमा लिएको छ । गाँजा बोकेको ट्रक पनि प्रहरीले बरामद गरेको छ ।

धनकुटाको माथिल्लो क्षेत्रमा हरेक वर्ष व्यापक गाँजा खेती हुँदै आएको छ । प्रहरीले बोट नै नष्ट गर्ने अभियान चलाएपनि त्यसलाई पूर्ण रुपमा नियन्त्रण गर्न सकेको छैन । 

अहिले भेडेटार प्रहरीको काम नै दैनिक रुपमा धनकुटाबाट आएका मालबाहक सवारी साधनको चेकजाँच गर्ने र हप्तैपिच्छे ठुलो परिमाणमा गाँजा बरामद गर्ने भएको छ ।