विराटनगर वडास्तरीय फुटबलको उपाधि विराटनगर–११ लाई

विराटनगर । विराटनगरमा आयोजित प्रथम वडा स्तरीय नकाउट फुटबल प्रतियोगिताको उपाधि विराटनगर ११ नम्बर वडाले जितेको छ । 

विराटनगर जुटमिलको खेल मैदानमा शनिबार सम्पन्न भएको फाइनल खेलमा विराटनगर १२ नम्बर वडालाई ६–३ गोलले हराउँदै विराटनगर–११ ले उपाधि जितेको हो । जितको लागि विराटनगर–११ का सागर तिवारीले दुई गोल, मनोज मारिक, ज्योति मरिक, भुवन बस्नेत र  बिवेक राईले १–१ गोल गरे । 

विराटनगर–१२ को तर्फबाट रोशन राई ,अनुरोध चौधरी र बिमल राजवंशीले १–१ गोल फर्काए । खेलको म्यान अफ द सिरिज विराटनगर–१२ का ज्ञानेन्द्र मगर र हाइस्कोर विराटनगर–११ का सागर तिवारी घोषित भए ।

उपाधिसँगै विराटनगर–११ ले ३१ हजार रुपैयाँ हात पार्यो । उपबिजेता विराटनगर–१२  ले २१ हजार रुपैयाँ पाएको छ ।

बिजेता खेलाडीहरूलाई विराटनगर–१५ का वडाध्यक्ष प्रकाश साह, विराटनगर–१६ का वडाध्यक्ष उद्वब भुजेल, विराट गोल्डकप फुटबल ट्रष्टका अध्यक्ष किशोर शाहीले पुरस्कार वितरण गरेका थिए ।

विराटनगर १५ नम्बर वडा समितिको आयोजना र मिल्स भेट्रान रानी विराटनगरको संयोजनमा भएको उक्त प्रतियोगितामा विराटनगरका आठ टिमको सहभागिता रहेको  थियो ।