परिसंघद्वारा बुढीगंगा गाउँपालिकालाई कम्बल हस्तान्तरण

विराटनगर । नेपाल उद्योग परिसंघ कोशी प्रदेश समितिले आफ्नो सामाजिक उत्तरदायित्वस्वरुप मोरङको बुढीगंगा गाउँपालिकालाई ५० थान कम्बल हस्तान्तरण गरेको छ ।

तराईमा बढिरहेको शीतलहर र जाडोको समयमा सीमान्त वर्गका नागरिकहरूलाई न्यानो कम्बल सहयोग गरिदिन गाउँपालिकाका अध्यक्ष जीतनारायण थापा मगरले आग्रह गरेपछि परिसंघले सोमबार हस्तान्तरण गरेको जनाइएको छ ।

जाडोयाममा विपन्न तथा असहाय नागरिकहरूलाई शीतलहरबाट बचाउन सहयोग पुगोस् भन्ने उद्देश्यले पालिकालाई कम्बल उपलब्ध गराइएको परिसंघका महानिर्देशक विजयहरि शर्माले जानकारी दिए ।

बुढीगंगा गाउँपालिकाका प्रतिनिधिहरूले परिसंघको सहयोगप्रति धन्यवाद दिंदै लक्षित वर्गलाई प्रत्यक्ष राहत पुग्ने विश्वास व्यक्त गरेका छन् ।