अजरबैजानमा निधन भएका विराटनगरका डा. आरके सिंहको शव काठमाडौं आइपुग्यो

विराटनगर । अजरबैजानको बाकुमा सोमबार बिहान निधन भएका  विराटनगरका वरिष्ठ सर्जन डा. आरके(राजकुमार) सिंहको शव काठमाडौं आइपुगेको छ । डा. सिंहको शव आज बिहीबार बिहान टर्किस एयरको विमानबाट काठमाडौंस्थित त्रिभुवन विमानस्थल आइपुगेको हो ।

सो एयरलाइन्सको विमान आज बिहान ६ः१० मा अवतरण हुनैलाग्दा ‘मिस एप्रोच’ भएर ओभरसुट भएको थियो । केही बेर आकाशमै होल्ड भएपछि फेरि अवतरण गरेको उक्त जहाजले टर्कीको राजधानी इस्तनाबुलबाट डा. सिंहको कार्गो शव नेपाल ल्याएको हो ।

नेपाल आएपछि परिवार डा. सिंहको शव बुझी विराटनगरतर्फ प्रस्थान गरेका छन् । एम्बुलेन्समा राखेर शव सिन्धुलीको बाटोबाट विराटनगरतर्फ ल्याउँदै गरेको पारिवारिक स्रोतले जानकारी दिएको छ । शव अपरान्हसम्म विराटनगरमा आइपुग्ने बताइएको छ । विराटनगर–१० तिनटोलिया फणिन्द्र मार्गस्थित डा. सिंहको निवासस्थलमा शव केही समय राखी आजै अन्तिम संस्कार गरिने पारिवारिक स्रोतले जनाएको छ ।

विराटनगरका वरिष्ठ सर्जन डा. आरके सिंहको अजरबैजानको राजधानी बाकुमा स्थानीय समयअनुसार गत सोमबार बिहान साढे ६ बजे निधन भएको थियो । श्रीमतीसहित अजरबैजान गएका सिंहको ‘साइलेन्ट हर्टअट्याक’ का कारण निधन भएको बताइएको छ ।

उनी निधन भएको देशमा नेपाली दुतावास तथा सम्पर्क कार्यालयसमेत नभएको कारण शव ल्याउन रसियाको मस्कोस्थित नेपाली दुतावासले सहजीकरण गरेको थियो । मस्कोस्थित नेपाली राजदुत मिलन तुलाधारको सहजीकरणमा डा. सिंहको शव अजरबैजानको बाकुबाट टर्कीको इस्तानाबुल हुँदै नेपाल ल्याइएको हो ।

‘क्लब–४१’ नामको क्लबबाट अजरबैजान घुम्न र क्लबको साधारणसभा गर्न गएका बखत डा. सिंहको निधन भए थियो । ‘क्लब–४१’ राउण्ड टेबलमा ४० वर्ष उमेर कटेपछि आवद्ध हुने क्लब हो । सो क्लबको साधारणसभा गर्न विराटनगरबाट १२ जोडी श्रीमान्-श्रीमती सँगै गएका थिए । डा. सिंह साँझ सँगै खानपिन गरेर सुतेकोमा बिहान एक पटक पिसाब फेरेर ‘आफूलाई राति राम्रो निद्रा परेन’ भनेर फेरि सुतेका थिए ।

त्यहाँको समयअनुसार उनको बिहान साढे सात बजेतिर निधन भएको बताइएको छ । बिहान ९ बजेको भ्रमणका लागि डा. सिंहको जोडी तयार नभएपछि सोधखोज गर्दा डा. सिंह ओछ्यानमै अचेत थिए । उनी बसेको होटलमै डाक्टर बोलाउँदा चिकित्सकले ‘हि इज नो मोर’ भनेका थिए ।

डा. सिंह विराट शिक्षण अस्पतालका पूर्णकालीन चिकित्सकका साथै एसोसिएसट प्रोफेसर थिए । उनले धरानस्थित वीपी कोइराला स्वास्थ्य विज्ञान प्रतिष्ठानमा लामो समय पढाएका थिए । त्यस्तै डा. सिंहले पूर्वाञ्चल विश्वविद्यालयको मेडिकल संकायको डिन भएर पनि काम गरेका थिए ।

पर्साको गम्हरिया प्रिपा मूल घर भएका डा. सिंह केही वर्षदेखि विराटनगर-१० तिनटोलियामा आफ्नै घरमा बस्दै आएका थिए । वि.सं. २०१६ असार २ गते जन्मिएका डा. सिंहका एक छोरा, एक छोरी र श्रीमती छन् ।