नृत्योपासनाका विद्यार्थीको वार्षिक मुल्याङ्कन

विराटनगर । विराटनगर–२ स्थित शनिहाटमा सञ्चालित नृत्य प्रशिक्षण विद्यालय नृत्योपासनाले विद्यार्थीहरूको वार्षिक मुल्याङ्कन सम्पन्न गरेको छ । विद्यालयले मुल्याङ्कन पश्चात उनीहरूलाई प्रमाणपत्र समेत वितरण गरेको हो ।

नृत्योपासनामा प्रशिक्षण लिइरहेका प्राथमिकदेखि तेस्रो वर्षसम्मका १३ जना विद्यार्थीहरू मुल्याङ्कन परीक्षामा सहभागी भएको जनाइएको छ । विद्यार्थीहरूलाई भरत नाट्यम विधामा भारतको चेन्नाईबाट स्नातकोत्तर पूरा गरेकी नृत्योपासना विराटनगरकी सञ्चालक एवम् प्रशिक्षक सन्तोष निधि राठीले प्रशिक्षण गराएकी हुन् ।

विद्यार्थीहरूको मुल्याङ्कन प्रशिक्षक राठीसँगै कत्थक नृत्य प्रशिक्षक मनोवेन्द्रो दासले गरेका हुन् । मुल्याङ्कनपश्चात सहभागी विद्यार्थी अर्को तहमा प्रवेश गरेको जनाइएको छ । 

विद्यार्थीहरूलाई परीक्षामा उत्तीर्ण भएको प्रमाणपत्र समेत प्रदान गरिएको प्रशिक्षक राठीले बताइन् । उनले नृत्योपासनामा शास्त्रीय संगीतका विभिन्न रागमा नृत्य प्रशिक्षण सञ्चालन हुँदै आएको जानकारी दिइन् ।