लेटाङ जेसिज वर्ष २५ को पदस्थापन

लेटाङ । लेटाङ जेसिज वर्ष २५ का अध्यक्ष छत्र निरौलासहितका पदाधिकारीहरूको पदस्थापन कार्यक्रम सम्पन्न भएको छ ।

कार्यसमितिको दुई कार्यकारी उपाध्यक्षमा अमृत कार्की र अम्बर बहादुर विश्वकर्मा चयन भएका छन् । त्यस्तै उपाध्यक्षहरूमा रेहान शेख, शकुन्तला चौधरी, तेजुराम राई र पवन दाहाल रहेका छन् । अलिशा चौधरीले सचिवको जिम्मेवारी पाएकी हुन् ।

कार्यसमितिका अध्यक्ष निरौलासहित पदाधिकारीहरूको भव्य कार्यक्रमका साथ पदस्थापन गरिएको लेटाङ जेसिजका संस्थापक अध्यक्ष ओम प्रकाश श्रेष्ठले जानकारी दिए ।

पदस्थापन कार्यक्रमकी विशिष्ट अतिथि लेटाङ नगरपालिकाकी उपमेयर कृष्ण कुमारी निरौलाले समाजलाई राम्रो बनाउन जेसिजको भूमिका महत्वपूर्ण रहेको बताइन् । उनले लेटाङ जेसिजले विगतदेखि नै समाजसेवामा पुर्याएको योगदानको प्रशंसा गरिन् ।

कार्यक्रममा संस्थापक अध्यक्ष श्रेष्ठले स्थापना कालका भोग्नु परेका आरोहअवरोह स्मरण गर्दै २५ औं वर्षको कार्यसमितिले जेसिजलाई अझ बलियो बनाएर अघि बढाउने विश्वास व्यक्त गरे ।

कार्यक्रममा वर्ष २४ का अध्यक्ष दुर्गा घिमिरे, महासचिव अमृत कार्की, इलाका प्रहरी कार्यालय लेटाङका प्रमुख राकेश रेग्मी, वडा नम्बर ४ का वडाध्यक्ष राम कुमार श्रेष्ठ लगायतको उपस्थिति रहेको थियो ।

उक्त अवसरमा संस्थापक अध्यक्ष ओम प्रकाश श्रेष्ठ र पत्नी मिनादेवी श्रेष्ठले तेज शान्त स्मृति अवार्डबाट जेसी पवन दाहाललाई सम्मानित गरेका थिए ।