उदयपुरको होटल ड्रिमलेण्डमा तास खेलिरहेका ६ जना पक्राउ

उदयपुर । त्रियुगा नगरपालिका–११ स्थित पिपल चोकमा रहेको होटल ड्रिमलेण्डमा जुवातास खेलिरहेका ६ जनालाई प्रहरीले पक्राउ गरेको छ ।

जिल्ला प्रहरी कार्यालय उदयपुरबाट खटिएको प्रहरी टोलीले होटलको तेस्रो तलाबाट उनीहरूलाई तास खेलिरहेकै अवस्थामा पक्राउ गरेको जनाएको छ । 

पक्राउ पर्नेहरूमा ४७ वर्षीय भलराज राई, ४५ वर्षीय चित बहादुर राई, ४६ वर्षीय बोध बहादुर थापा मगर, ३८ वर्षीय विजय राई, ३० वर्षीय संजीव बुढाथोकी र ४९ वर्षीय पुर्ण बहादुर राई रहेका छन् ।

उक्त स्थानबाट नगद ५७ हजार ६२५ रुपैयाँसहित तीन बुङ तास, ६ थान मोबाइल र ४ थान मोटरसाइकल समेत बरामद गरिएको प्रहरीले जनाएको छ । 

पक्राउ परेका सबैलाई बरामद सामग्रीसहित अनुसन्धान अघि बढाइएको जनाइएको छ ।