ग्रामथानमा आजै मतगणनाको तयारी, दुई टोलीले मत गन्ने

विराटनगर । मोरङको ग्रामथान गाउँपालिकाको अध्यक्ष पदका लागि आज मतदान सकिएर मतपेटिका संकलन भएपछि मतगणना सुरु गर्ने तयारी अघि बढाइएको छ ।

मुख्य निर्वाचन अधिकृतको कार्यालयका सहायक निर्वाचन अधिकृत रामराज पौडेलले मतगणना स्थलमा मतपेटिकाहरू संकलन भएपछि सर्वदलीय बैठक बसेर तुरून्तै गणना सुरू गर्ने जानकारी दिए । 

उनले निर्वाचन आयोगले तुरून्तै मतगणना गर्नका लागि निर्देशन दिएको बताउँदै मतगणना स्थलसमेत तयारी अवस्था राखिएको बताए ।

‘तत्काल मतगणना सुरू गर्नु भन्ने माथिको निर्देशन छ, मतपेटिका प्राप्त भएपछि सर्वदलीय बैठक बसेर मतगणना सुरू गर्छौं’ पौडेलले भने, ‘दुईवटा टोली बनाएर गन्ने तयारी छ, मतगणना स्थल निर्माण भइसकेको छ ।’