जन्मदिनको भोज खाने क्रममा २७ जना बिरामी

उदयपुर । उदयपुरको त्रियुगा नगरपालिका–७ नमुना चोकमा जन्मदिनको भोज खाने क्रममा २७ जना बिरामी परेका छन् । 

बुधबार बेलुका करिब ९ बजेतिर जितेन्द्र राईको घरमा जन्मदिनको अवसरमा भोजका लागि तयार पारिएको खाद्य परिकार खाएका छिमेकी परपाहुना बिरामी परेको जिल्ला प्रहरी कार्यालय उदयपुरले जनाएको छ ।

भोजमा वरिपरिका छरछिमेकी सहभागी भएका थिए । 

उनीहरूले रोटी, अचार, पुरी, बुनियाँ, पुवा लगायतका खाद्य परिकार खाएका थिए । ती परिकार खाएपछि उनीहरूलाई झाडापखाला लागेको जनाइएको छ । बिरामी भएका सबैलाई उपचारका लागि बिहीबार बेलुका ८ बजे जिल्ला अस्पताल उदयपुरमा भर्ना गरिएको थियो ।

बिरामी हुनेहरूमा पुरुष ३ जना, महिला–११ जना, बालक ५ र बालिका ८ जना रहेको प्रहरीले जनाएको छ । उपचारपछि २६ जना घर फर्किए पनि एक जना बालकको उपचार चलिरहेको जनाइएको छ ।

प्रहरीले उक्त घटनाको अनुसन्धान समेत गरिरहेको जनाइएको छ ।